Telegram urimi për Pavarësinë e Kosovës

The Society of Albanian-American Writers
P.O. Box 833213 Richardson, TX 75083 972 669 2561
Albanianliterature.org

---

I nderuar z. THAÇI,

Në emër të Shoqatës së Shkrimtarëve Shqiptaro-Amerikane, dhe në emrin tim personal, ju urojmë nga zemra Gëzuar 17 Shkurtin (2008), Ditën e Pavarësisë së Kosovës.

Në jemi të ndërgjegjshëm se Pavarësia e Kosovës është fituar me kohë. Provat për ketë janë dheu i zbutur nga gjaku dhe i trazuar nga eshtrat e kosovareve që dhanë jetën për ta fituar atë.
Gjithashtu jemi të ndërgjegjshëm se Kosova nuk ka asgjë tjetër për të shpallur, përveçse caktimit të datës së sotme, si data e pavarësinë e saj. Është bota ajo që ka shumë për të shpallur para nesh. Njohja pavarësisë së Kosovës nga Bota do të thotë njohja e pavarësisë se vetë botës nga idetë e gabuara, se një popull duhet të humbë në luftë gjysmën e tij, që gjysma tjetër ta jetojë vetëvendosjen.

Sot i gjithë njerëzimi e di se pavarësia Kosovës nuk do të ketë kurrë më kthim mbrapa, sepse asnjë nga ata që e fituan atë me vdekjen e tyre nuk mund të kthehen më në jetë. Ndaj pavarësinë e Kosovës e pritëm si një fenomen shumë të vonuar, por më tepër si një fenomen absolutisht të mezi-pritur.

Amerika dhe Bashkimi Evropian meritojnë mirënjohjet tona më të thella për mbështetjen e tyre ndaj nesh, ndaj një populli liridashës dhe deri në fund paqësor, siç është populli shqiptar i Kosovës. Jo vetëm ata, por e gjithë bota do e kuptojnë se një Kosovë e Pavarur dhe Sovrane do të jetë një gur tepër i rëndësishëm në themelet e paqes dhe stabilitetit jo vetëm të Ballkanit, por edhe të gjithë botës.

Edhe një herë Gëzuar 17 Shkurtin, Ditën e Pavarësisë së Kosovës.