Poezia e Adnan Mehmetit, "urë që lidhë dy brigjet"

-- nga Beqir SINA, Nju Jork, SHBA

Poezia e Adnan Mehmetit, "një urë që lidhë dy brigjet" dhe që ka bëre më shumë se një poet, shkrimtar apo publicist

Stamford Connecticut: Shoqata e Shkrimtarëve Shqiptaro-Amerikanë organizoi, më 1 qershor, ditën Ndërkombëtare të Fëmijëve, promovimin e krijimtarisë letrare të shkrimtarit, nga Presheva, në Amerikë, poetit Adnan Mehmeti. Kësaj rradhe kjo shoqatë për këtë promovim kishte zgjedhur njërin prej mjedisve në Auditorin e Bibliotekës "The Ferguson Library", në qytetin e 125 mijë banorëve Stamford-in, të shtetit federal të bregut lindor Connecticut. Studentë, adhurues të librit, poetë, gazetarë, publicistë, shkrimtarë, editorë dhe përkthyes të shoqatës më të madhe dhe të vetme të botës letrare në SHBA-së, u mblodhën të dielen pasdite në Stamford - Connecticut.

Gazetari Qazim Doda, i tha gazetës Bota Sot, se e mira e këtij aktiviteti ishte jo vetëm prezenca e shumtë e shkrimtarve, poetëve, studentëve dhe adhuruesve amerikan të librit nga ky qytet, por edhe për faktin se për here të parë, u organizua një aktivitet letrar në komunitetin shqiptar, të këtij shteti. Ku jeton e punon një komunitet shqiptarë mjaft i madh.

Tubimin e udhëhoqi nënkryetari i Shoqatës Mëhill Velaj. Në fjalën e tij përshëndetëse ai e veçoi krijimtarinë letrare të Adnan Mehmetit, duke e cilësuar si një urë që lidhë dy brigjet" dhe që ka bëre më shumë se një poet, shkrimtar apo publicist. Në metoforë shprehet Velaj,"Nëse vazhdon ta heqësh "Detin në mes", je urë, je shkëmb, je Rozafë, që sa here bie në tokë Ti ngitesh përsëri".

Zoti Dalan Luzaj, kryetari i Shoqates, që kishte ardhur enkas nga Chikagoja, tha në fjalën e tij, se: "Emigracioni shqiptar i ka sjellur vepra të çmuara Atdheut. Vështërsitë e krijuesve janë të theksuara. Adnani është poet atdhetar. Ai hodhi kohët e fundit dy libra me vlerë që do të zëjnë vend të merituar në letërsinë shqiptare"

Christina Villani, poetesha dhe studiusja e letërsisë amerikane, u shpreh se poeti Adnan Mehmeti me krijimtarinë e tij artistike, është i mirëpritur tek lexuesi i pasionuar amerikanë. Përmbledhja e tij në anglisht "Leave the door open" sjellë mesazhin më fisnik që përcillet nga poeti i talentuar shqiptaro-amerikan. Sakaq, një amerikane tjetër Jesica Day ka lexuar poezitë e Adnanit në anglisht.

Shkrimtari Ramiz Gjini,u shpreh, që "Adnan Mehmeti, është poet i formuar, një vëzhgues mjaft i hollë i realitetit. Ai është poet soji."Ashtu si të gjithë poetët e vërtetë, Adnan Mehmeti, ka një frikë, që konsiston në përpjekjet e tij të vazhdueshme për të gërmuar brenda shpirtit njerëzor, për të ndriçuar thellë atyre skutave të fshehta ku struken e fshihen enigmat e kësaj bote. Do të desha, që në mbyllje të fjalës time, të përdorja disa vargje të famshme të një njeriu të madh të letrave shqipe, të një poeti, filozofi dhe ish-profesor universiteti. E kam fjalën, për të ndjerin, Isuf Luzaj, i cili, në një poezi të tij, thotë: "S'e trembi furtuna, s'e trembi tërmeti / E trembi pikpyetja, që dot nuk i gjeti / jetës kuptim".

Pal Ndrecaj, eshte shprehur se:"Pas leximit të librit të fundit të Adnan Mehmetit "Deti në mes" paraqiten nivele shkallë-shkallësh i reagimit emocional të cilin, lexuesi e përjeton në shkallë të ndryshme"

Shkrimtari Tom Mrijaj(publicist) ka thënë mes të tjerash seduke lexuar poezitë e librit të fundit "Deti në mes", pa dashur vjen e krijohet një ndjenjë ngrohtësie në shpirt, që vjen gjithnjë duke u rritur nga njëra poezi në tjetrën, ndjenjë kjo që buron nga dashuria e madhe e poetit"

Poetja, Kozeta Zylo, mendon qe poezia e Adnanit, duhet të lexohet dhe të rilexohet për t'u kuptuar. ..Ndarjet janë të dhimbshme. Cili prej nesh nuk e ka përjetuar dhimbjen e ndarjes? Adnani, na e përshkruan në mënyrë artistike këtë ndarje nga largimi nga aeroporti i Prishtinës

Rajmonda Moisiu, poetja dhe publicistja që vinte nga Hartford, e falenderoi Annanin, qe me promovimin e librit, i krijoi mundesine te takohej me te. Këtu, tha ajo, takova për here të pare dhe njohë shumë krijues të mirënjohur si Adnan Mehmetin, Ramiz Gjini, Selaudin Velaj, Mëhill Velaj" Pas 30 vjetësh takojë Iliriana Sulkuqen".Adnan Mehmeti I këndon dashurisë, mallit, trishtimit. Edhe kur është I mërzitur di të këndojë për dashurinë. Poet me vlera të larta kombëtare"

Ajo përcolli një mesazh nga dhjetra e dhjetra vajzave dhe grave shqiptare që jetojnë në gjithë botën, por që janë mbledhur bashkë në rrjetin MbarFemëror Shqiptar "Pan Albanian Women Network" të udhëhequr nga Merita Bajraktari McCormack.

Iliriana Sulkuqi(poete), tha se vinte për herë të parë në këtë qytet të bukur ku takoj shumë njerëz të mire të këtij komuniteti. Ajo e falemnderoi Adnanin që je një shembull për të gjithë krijuesit tjerë. Të shkruash për kolegun është kulmi human I një krijuesi"

Kurse Dr. Selaudin Velaj, shprehet i gezuar sepse, ndersa poetët shqiptarë dikur në emigracion numëroheshin me emra sot, tha ai, kemi filizat e letërsisë shqiptare, siç është poeti i talentuar Adnan Mehmeti që sjellë vlera të çmuara artistike"

Botuesi i revistës "Trojet Tona", publicisti Tom Paloka, ka mendimin se botimi i çdo libri është kontribut i vyeshëm në kulturën tone. Por librat e Adnan Mehmetit, janë për t'u veçuar për të mire. Metafora, si formë stilistike është e kuptueshme dhe e kapshme për lexuesin, ç'ka ia shton vlerat artistike.

Qazim Doda,(gazetar) ka pikasur atë se poezia e Adnan Mehmetit, është e lidhur ngushtë me ndjenjat e zjarrta për atdheun. "Deti në mes," tregon mallin e tij për atdheun.

Doda në fjalën e tij, citohet të ketë thënë se; "Në poezinë 36 Shkronjat, poeti shpreh revoltën e tij për përdhosjen e historisë që e bëjnë sllavo maqedonasit në qytetin e shkronjave Manastir, të cilin e thërrasin Bitolj. Me një varg të kësaj poezie autori argumenton se historia shkruhet me 36 shkronja, ndërsa përtej lumit alfabeti cirilik numëron I turpëruar, kjo na len të kuptojmë se asimilimi dhe gjenocidi kulturor ndaj shqiptarëve ka arritur aq lart sa që Manastirin janë duke u munduar ta mbulojnë hijet e zeza të alfabetit të turpëruar sllavo maqedonas.

Kur flet për fshatin e lindjes Letovicën, poeti tregohet shumë vetëmohues dhe nuk flet shumë për fshatin e vet të lindjes, Duhet të jeshë i mire dhe fisnik, të jetosh në këto shtëpi. Këtu poeti nuk e përmend se duhet të jesh trim dhe i edukuar të jetosh në këto shtëpi, pothuajse nuk ka shtëpi që nuk e ka të paktën një njeri me edukim të lartë arsimor, pastaj nuk ka shtëpi që nuk e ka ndihmuar UÇK-në e më vonë UÇPMB-në ose me para ose ia ka dhënë nga një mashkull për të u radhitur krahë për krahë me ushtarët tjerë.

Për të mos u ndalur, me kaq, poeti thurë vargje legjendës së zones së Karadakut-Komandant Lleshit. Në poezine me titull Kushtrimi, autori shkruan një strofë që e përshkruan një histori të vërtetë duke thënë: Në Luginën e Preshevës, në mëngjesin pranveror, Kushtrimin e dha një trim, me nofkën Komandant Lleshi.

Poeti Adnan Mehmeti shërben si një udhërrëfyes për ata që ju ka humbur udha në oborr, se kudo që të shkosh në shpirtë e në mendje duhet ta kesh atdheun dhe duke i respektuar ata që ranë për dritën tone jemi më të forte para armikut dhe më të pastërt në shpirtin tone.

Telegramet dhe mesazhet :

U lexuan telegrame dhe mesazhe nga Tirana, Prishtina, Bujanoci, Londra, Dallasi, San Diego, Uashington Dc.Richardson, Texas. Mes tyre ai Gjekë Marinaj, themeluesit i shoqatës së shkrimtarëve Shqiptaro-Amerikanë e profesor Peter Prifti, nga San Diego, Kaliforni. Në emër të redaksisë Perspektiva, nga vendlindja e tij thuhej te dëshirojmë suksese në fushën e krijimtarisë letrare, përmes së cilës keni afirmuar vlerat e kulturës shpirtërore dhe materiale të Luginës së Preshevës, kësaj dege të ndezur të Arbrit.

Me kërshëri, të madhe, në fund është ndjekur edhe fjala e poetit Preshevar Adnan Mehmeti. Zonja dhe zotërinj! Të dashur miq të librit! mes emocioneve të shumta shprehet ai para kolgeve të tij. Në shpirtin Tuaj fisnik jeton dashuria dhe respekti për fjalën e bukur shqipe, thotë Mehmeti. Prezenca Juaj në këtë tubim më gëzon shumë.Në ditën e sotme unë përkulem para Jush. Ju jeni ata që më gëzuat dhe më nderuat me prezencën tuaj: këtu shohë shumë krijues dhe miq që keni bërë udhë të gjatë, që jeni shkëputur nga obligimet e shumta për të kaluar këtë ditë të bukur të fundit të majit. Unë lutem, për shëndetin Tuaj, për sukseset Tuaj, për mbarësinë Tuaj.