Integrimi në BE, projekti më madhor i shekullit XXI

"12 qershori është një ditë e bekuar në historinë e kombit tim, ditë e lidhur me përpjekjet e tij të mëdha për liri dhe identitet evropian. Nënshkrimi i Marrëveshjes së Stabilizim-Asociimit shënon për shqiptarët një hap madhor drejt realizimit të ëndrrës së tyre për rikthimin dhe ribashkimin me familjen e tyre europiane.

Rikthim, sepse shekulli i kaluar i rezervoi kombit tim copëtime të padrejta dhe të pamerituara, pushtime, racizëm dhe spastrime etnike, si dhe diktatura të egra që e izoluan tërësisht nga Europa.

Por këto vuajtje nuk arritën të mposhtin dot kulturën, shpirtin dhe orientimin e tij perëndimor, vlerat e mëdha që ai ndan me kombet tuaja. Për këto arsye, integrimi në BE është për ne shqiptarët projekti më madhor i shekullit XXI, projekti i të ardhmes europiane që meritojmë, kurse Marrëveshja e Stabilizim-Asociimit është harta e rrugës për të arritur këtë të ardhme.

Në këtë ditë të shënuar, dëshiroj të falenderoj përzemërsisht presidencën austriake dhe personalisht Ju, zonja Plasnik, të falenderoj Ju, zotërinj ministra të vendeve anëtare të BE-së, zotin Solana dhe zotin Rehn, qeveritë tuaja dhe Komisionin Evropian, për përkrahjen dhe kontributin e tyre, që bënë të mundur asocimin me Bashkimin Euopian.

Nënshkrimi i Marrëveshjes së Stabilizim-Asociimit nga Ju është vlerësimi i madh që Ju i bëni shndërrimit paqësor të vendit tim gjatë këtyre 14 vjetëve, nga vendi i komunizmit më totalitar, ateizmit të imponuar, hiperkolektivizmit të plotë dhe shkatërrimit të iniciativës së lirë, në vendin e pluralizmit politik të konsoliduar, lirisë së besimit fetar dhe tolerancës së shkëlqyer fetare, me një sektor privat në rritje e zhvillim, i cili kontribuon për mëse 80% të prodhimit të brendshëm dhe ku të ardhurat për frymë janë rritur 11 herë. Shqiptarët i arritën këto në sajë të bujarisë dhe solidaritetit të jashtëzakonshëm dhe të gjithanshëm të qeverive, kombeve dhe taksapaguesve të vendeve tuaja. Ne jemi shumë mirënjohës.

Shqipëria do të bëjë çdo përpjekje, do të ndërmarrë çdo reformë, në mënyrë që Marrëveshja e Stabilizim-Asoccimit që firmosëm sot me Ju, tërësia e normave, standarteve dhe kritereve të saj, të partneritetit europian, si dhe kriteret e Kopenhagenit, të shndërrohen në themele solide të demokracisë sonë të bazuar në tregun e lirë, garantimin e lirive dhe të drejtave të qytetarëve dhe minoriteteve, shtetin ligjor, ndarjen e pushteteve dhe funksionimin e institucioneve të pavarura, pavarësinë e mediave, luftën me zero tolerancë ndaj krimit të organizuar dhe korrupsionit.

Unë jam i vetëdijshëm se ne nënshkruajmë këtë Marrëveshje në një kohë kur në memorien tuaj dhe qytetarëve të vendeve tuaja janë ende të pazbehura lajme, skena dhe ngjarje të pakëndshme nga Shqipëria, dhe në një kohë kur sindroma e lodhjes nga zgjerimi i BE-së është realitet. Por unë jam sot këtu për t'u garantuar ju, qeveritë dhe kombet tuaja, se krimi i organizuar shqiptar dhe sistemi i korrupsionit po çmontohen me shpejtësi, dhe se Shqipëria do të jetë ndër vendet më të sigurta në rajon. Po kështu rajoni gjeopolitik, Ballkani, me angazhimin e SHBA-ve dhe vendeve të BE-së, është shndërruar nga rajon lufte, konfliktesh të egra që ishte pak vite më parë, në rajon bashkëpunimi, miqësor dhe integrimi rajonal dhe europian.

Së fundi, dua të theksoj se Ju firmosni Marrëveshjen e Stabilizim-Asociimit me një komb, i cili është i regjistruar në analet e historisë dhe qytetërimit europian si njëri ndër banorët më të lashtë të tij, që në shekuj dhe mijëvjeçarë djep dhe strehë ka patur Europën dhe që përveç saj, nuk mund të ketë të ardhme tjetër. Ja se pse ai është kaq i etur të bashkohet me ju. Një ndër etërit e Rilindjes sonë Kombëtare, shkruante se për shqiptarët dielli lind nga Perëndimi. Ata janë krenarë dhe mirënjohës për diellin që shohin këtë mëngjes.
Ju faleminderit!