Teuta Eno Koço, Rimishërimi i sopranos sharmante

Ka trashëguar sharmin dhe vokalin e sopranos nga Tefta Tashko Koço. Në fakt është mbesa e saj dhe ndoshta të gjithë do ta identifikonin më shpejt, nëse për asosacion emrash, do ta quanim Teuta Eno Koço. I mjafton vetëm kaq që në Shqipëri të shihet e privilegjuar, por në Angli ku jeton që prej 16 vjetësh i duhet shumë më tepër. Aq sa kur e pyet se çfarë do të thotë për të të jetë mbesa e Tefta Tashko Koços, nxiton të përgjigjet se atje ku ajo po ndërton karrierën e saj, kjo nuk do të thotë asgjë për të. Me buzëqeshjen e saj të madhe sapo është prezantuar si imazhi i një fushate të Organizatës Ndërkombtare të Migracionit në Tiranë, IOM, për të propaganduar në Shqipëri emigracionin e rregullt.

Sepse ajo vetë është një emigrante. Ashtu siç janë Inva Mula, Tedi Papavrami, Kledi Kadiu apo shqiptarë të tjerë që tani janë bërë të njohur edhe në botë, por që në të shumtën e rasteve kanë kaluar nga ato radhat e ambasadave, kanë pritur për të marrë viza dhe dokumente të rregullta, pa mundur të lëvizin lirisht dhe nuk është çudi që ndonjërin prej tyre ta shihni ndonjë ditë të presë t’i thërrasin emrin pas kangjellave të ndonjë ambasade në Tiranë. Edhe Teutës, sopranos 28 vjeçare që ka kënduar në teatrot e operës në Angli, Francë, Itali apo Amerikë, i është dashur ta kalojë peripecinë e emigrantit në pritje të nënshtetësisë.

Pas 16 vjetësh, kur ajo nuk është më si në fillim ndër të paktat emigrante shqiptare në Angli, rrëfen se pamjet nga skena e jetës së disa emigrantëve shqiptarë atje, kryesisht ato që kanë shkuar ilegalisht, janë vërtet nga ato që të vrasin sytë. Femrat shqiptare të trafikuara dhe që prostituojnë në Londër janë një tjetër pamje e padëshirueshme për sopranon e re shqiptare dhe për të gjithë ata shqiptarë që përpiqen të ndërtojnë nga Londra, në Milano, Nju Jork apo Toronto një jetë dinjitoze.

Ndërsa përpiqet edhe vetë çdo ditë të investojë për karrierën e saj dinjitoze, këngëtarja lirike që tani vjen në Shqipëri si turiste, rrëfen, përveç misionit të saj të ri si ambasadore e vullnetit të mirë për IOM për nxitjen e migracionit të rregullt dhe parandalimin e trafikimit, edhe aventurën e saj profesionale si këngëtare lirike. Kapërcimet nga operat në zhanrin në modë të muzikalit dhe deri tek filmat, duke aspiruar një të ardhme edhe në botën kinematografike.

Tanimë ka përfunduar një film muzikor ku ka patur një rol të rëndësishëm dhe i cili është një bashkë-prodhim anglez dhe hollivudian. Në fakt pjesa është mjaft e njohur dhe është pikërisht “Flauti Magjik” i Moxartit që do ta nxjerrë para ekranit të madh sopranon shqiptare në rolin eLubanaras, gruas së personazhit kryesor. Në lidhje me këtë rol “Times” shkruan frazën “his Lubanara is the delectably golden-voiced Albanian soprano Teuta Koco”, duke e cilësuar të artë dhe të këndshëm zërin e shqiptares. Ndërsa kritika e “Independent” për të shkruan “His ëife, Lubanara (played by the pretty and charming Teuta Koco)...” duke iu referuar këngëtares lirike shqiptare me komplimenta për sharmin dhe bukurinë.

Shumë energjike si natyrë, Teuta rrëfen megjithatë se të rendë pas audicioneve të shumta nuk është një punë e lehtë. Në fakt, kur i fiton, ato i sigurojnë punën këngëtares shqiptare, që është pritur mirë deri tani nga kritika britanike, edhe pse nuk ka vetëm pak kohë që ka përfunduar studimet, fillimisht në Angli për kanto dhe mandej në Francë sërish për kanto, pa harruar pianon që e ka studiuar gjithë jetën. Do të qëndrojë vetëm një hop në Tiranë për të fluturuar sërish drejt Anglisë ku e presin audicionet e tjera për punë, ndërsa edhe mëngjesin para se të nisej për në Shqipëri ka bërë dy të tilla. Megjithëse jeta e saj gjithnjë në lëvizje është shumë e kushtueshme, ajo thotë se arrin ta fitojë vetë atë plotësisht. Modeste, Teuta tregon se megjithatë ky është vetëm fillimi i karrierës së saj dhe kryqëzon gishtat për fat kur flet për të ardhmen e saj në botën e bukur por edhe të vështirë ku ka zgjedhur të futet. Ato rreshtat e shkurtër të kritikës për të në gazetat e përditshme britanike e mbajnë në ankth derisa gazeta të dalë në treg, por (duke kryqëzuar gishtat) deri tani kanë qenë kritika të mira në adresë të saj.

E fejuar me një marsejez, Olivier Paulides, që merret me internetin, Teuta thotë se ka shumë pak miq të vërtetë, por se ata janë një mozaik i vërtetë pasi janë shumë të ndryshëm nga njëri-tjetri. Ndërsa është larguar shumë e vogël nga Shqipëria, pa mundur të marrë miqësira me vete, ajo megjithatë e sheh të rëndësishëm profilin e aj si këngëtare këtu dhe megjithëse nuk e pëlqen shumë ambientin dhe kushtet e punës në Shqipëri thotë se do t’i mirëpriste ftesat për bashkëpunim këtu.

Fushata
Emigrimi i rregullt ka imazhin e Teuta Koços

A është emigracioni i rregullt zgjedhje dhe mundësi? IOM, organizata ndërkombëtare për migracionit thotë po, duke nisur një fushatë informimi publik me mbështetjen financiare të Ambasadës Britanike, për nxitjen e migracionit të rregullt dhe për të treguar rreziqet e largimit nga vendi në rrugë jo të rregullta. Në Hotel Tirana është prezantuar dje edhe një film dokumentar i realizuar nga regjisori Ylli Pepo pikërisht për emigrimin e rregullt. Rrethet me nivelin më të lartë të emigracionit të parregullt në Shqipëri janë Shkodra, Tirana, Durrësi, Vlora, Kukësi dhe Peshkopia.

Unë, mbesa e Tefta Tashko Koços

“Teuta është vajza e Enos, mbesa e Teftës, kështu që e ardhmja ime ishte paksa e vendosur që në fillim. Gjithashtu unë jam një vajzë që u rrita gjysmën e jetës në Shqipëri dhe gjysmën tjetër në Angli, dhe shumë vendime të jetës si për shembull për të kënduar, i mora vetë. Pra ishte fati im që të këndoj duke patur parasysh traditën muzikore në familjen time por në të njëjtën kohë ishte edhe zgjedhje e imja.” Shkëputur nga një intervistë e saj në ALBmuzika

Për filmin-opera që po realizon

“Eshtë film dhe opera njëkohësisht, pjesa ‘Flauti Magjik' e Moxartit. Eshtë film i vërtetë në plot kuptimin e fjalës. M'u desh të bëja konkurse të shumta për të marrë rolin e “First Lady” ose të Zonjës së Parë dhe është një film që realizohet nga një regjisor dhe aktor i famshëm hollivudian, Kenneth Branagh. Gjithashtu incizuam operën në Abbey Road Studios që ishte një fat i madh për ne muzikantët, nën dirigjimin e James Conland, po ashtu një emër tjetër i njohur Amerikan. Eshtë një eksperiencë krejt e re dhe jemi të gjithë tepër të lumturuar nga ky projekt. Filmi është xhiruar në Shepherton Studios ku janë realizuar ‘James Bond' dhe filma të tjerë të famshëm. Gjithnjë duke qëndruar në lidhje muzikore patjetër, sepse është një film i operas.”
Shkëputur nga një intervistë e saj në ALBmuzika