Madlen Bardhi nga Gjakova, pagëzuar me emrin e Medlin Albright

BENSONHURST - BROOKLYN (NY) "Ollbrajt nderohet me Medaljen e Artë të Lirisë" nga Kosova, medalje kjo që Presidenti i Kosovës, Dr. Ibrahim Rugova, ia dorëzoi ish-sekretares amerikane të Shtetit, Medlin Ollbrajt, më 12 qershor 2004, në 5-vjetorin e Ditës së Lirisë të Kosovës. Pas, marrjes se medaljes "Medalje e Artë të Lirisë", me të cilën e ka dekoruar Presidenti Rugova, ajo zhvilloi edhe një takim me presidentin Kosovës, ku bisedoi për gjendjen aktuale në Kosovë. Presidenti Rugova, pasi shprehu kënaqësinë për takimin me zonjën Ollbrajt, e çmoi si mike të madhe të Kosovës dhe të popullit tonë.

"Kosovës i kam kushtuar shumë kohë, duke menduar se si ta ndihmoja. Shumë shpesh jam ndierë edhe e shqetësuar për të. Prandaj sot jam shumë e kënaqur që jam këtu, pikërisht këtë vit që është vendimtar për Kosovën", - u shpreh pas takimit me Rugovën, Ollbrajt. Ish-sekretarja e Shtetit porositi që në Kosovë duhet të zhvillohet demokracia dhe kërkoi mbrojtjen dhe respektimin e të drejtave të pakicave. "Të gjithë duan t'ju ndihmojnë. Unë nuk i përfaqësoj SHBA-të zyrtarisht, por po flas si një qytetare amerikane dhe, shpresoj, si një mike e këtij vendi, do të bëj çdo gjë që t'ju ndihmojmë sepse ky vit është vendimtar për Kosovën", - theksoi Ollbrajt, duke thënë më pasë se" E ndiej veten kosovare".

Kjo thënje e saj ka shumë kuptime - nëse do t'i referohemi edhe editorialit të agjencisë së lajmeve AP (Associated Press), më 6 shkurt 2003, nga gazetari i saj William J. Kole, me titull "Reviled in many places around the world, Americans are adored in Kosovo". Jo pa qëllim pas kësaj vizite, ju kthyem edhe një her këtij editoriale të cilit pas botimit në axhesinë më të madhe amerikane ju referuan thuajse të gjitha gazetat më të mëdha amerikane. Të cilat, botuan të njëjtin artikull, ku shkruhet se në Kosovë amerikanët janë më të sigurtë dhe më të admiruar se në çdo vend tjetër të botës.

Editoriali shkruante se flamuri amerikan është prezent dhe valvitet në çdo shtëpi shqiptari të Kosovës. Një çift shqiptar nga Kosova, pas luftës me krenari, në shenjë mirënjohjeje, i kanë vënë emrin vajzës së tyre, Madeleine Albright. Editoriali citon se edhe një pallat i lartë gjashtëkatësh në qendër të Prishtinës, ka emrin dhe posterin gjigand të Presidentit Bill Klinton, kur edhe bulevardi më i madh i Prishtinës, mban emrin e Presidentit Bill Klinton.

Gjithçka kulmon në Kosovë, me vendimin e Presidentit të Kosovës, Dr. Ibrahim Rugova, i cili, ka vendosur që ndërtesa e Presidentit të Kosovës, të emitojë nga ana strukturore Shtëpinë e Bardhë "White House," dhe të thirret me të njëjtin emër. Ndërkohë, të gjitha këto argumente gjenden në Kosovë, kur shumë pjesë të botës, duke përfshirë edhe vende fqinje nuk i duan amerikanët, si shqiptarët. Por, në Kosovë ndryshon gjithçka, amerikanët janë më të sigurtë, më të admiruarit e më të mirëpriturit.

"Kur unë shoh skena të tilla, kur njerëz të ndryshëm djegin flamurin amerikan, jam thellësisht i vrarë", thotë Dr. Besnik Bardhi nga Gjakova, në jug-perendim të Kosovës, qyteti i cili, thuhet se ka edhe numrin më të madh të të vrarëve gjatë luftës e gjenocidit në vitet 1989-99.

Presidenti i Kosovës Dr. Ibrahim Rugova ia dedikon gjithë këtë mrekulli - admirimin dhe respektin që kanë shqiptarët, për Amerikën, Presidentëve Willson, Reagan, Bush i vjetër, Klinton e tjerë. Presideti i Kosovës Dr. Ibrahim Rugova thotë: "Ne i duam amerikanët sepse ata na dhuruan lirinë që ne dëshironim". Rugova vazhdon duke thënë se "pikërisht për këtë ka një respekt të madh dhe ideal". "Me Amerikën ne jemi të vegjël, por miq të mëdhenj që mund të bëjmë edhe punë të mëdha", thotë Rugova. Pas vizitës së ish-sekretares së Shtetit, Madelein Albright në Kosovë, gazeta kombëtare Bota sot, zhvilloj një bisedë me prindërit e vajzës Madelein Bardhi nga Gjakova, pagëzuar me emrin e Madelein Albright.

BOTA SOT: Dr. Bardhi, Si e përjetoni ju dhe familja juaj vizitën në Kosovë, të ish-sekretares së Shtetit, Madelein Albright ?
Dr. Besnik Bardhi: Ne ishim në pushime verore në Allanya të Turqisë deri më 1 korrik. Në Gjakovë fillova punën menjëherë dhe lajmin për ardhjen e znj. Albright e kuptova nga një pacient, i cili më pyeti se a do të takohemi me të. Mbeta i hutuar për një moment, nuk e dija fare për ardhjen e saj në Kosovë. Në kokën time filluan të më sillen lidhjet të cilat duhet aktivizuar për të bërë aranzhimin e takimit. U ula pranë kompjuterit deri në orët e vona të mbrëmjes dhe falë internetit arrita që të dërgoj shumë letra në adresa të ndryshme elektronike. Njëra nga ato adresa ishte ajo e Institutit Kombëtar Amerikan për Demokraci në Prishitinë. Të nesërmen ndodhi mrekullia, dikush nga zyrtarët e këtij institucioni më informoj me telefon, se takimi aq shumë i pritur do të realizohet më 4 korrik, në Prishtinë, pikërisht në ditën e festës së madhe amerikane. Ishte ëndërr e kahmotshme që të takoj Medlinen time të vogël me Medlinën e madhe.

BOTA SOT: Dr Bardhi, na tregoni sesi ju lindi ideja që të vinit emrin e ish-sekretares së Shtetit, Madelein Albright, në ato momente lufte?
Dr. Besnik Bardhi: Ishte periudhë e luftës së përgjakshme, ishte viti 1999, koha e bombardimeve në Kosovë. Me bashkëshortën time, si gjithë shqiptarët, përjetuam çaste dramatike. Situatat (me duket se e kam lexuar diku në një liber për historinë e dramaturgjisë), nuk mund të shpjegohen me fjalë. Nuk do të mundja t'i shpjegoj, edhe sikur të isha shkrimtar. Vdekja rrinte pranë nesh. Varej nga ne, të gjithë shqiptarët, nga cili pozicion e shihnim vdekjen, dhe natyrisht, në çfarë distance. Na doli pengesa të mund të largoheshim për në Shqipëri, bashkë me të tjerët. Ime shoqe mbante shtatzënësi të rëndë.

Të rëndë meqë shtat vjet pësonte dështime pas dështimeve në lindje. Dikush duhej të vdiste: ose fëmija ynë, nëse merrnim rrugë, ose ne të gjithë së bashku, nëse qendronim midis flakës se tmerrshme të piromanëve paramilitarë serbë. Në këtë situatë ne mbetëm në Gjakovë gjatë tërë kohës. Dëshira e Zotit ishte që ne të mbijetojmë. Qëndrimi historik i Shteteve të Bashkuara të Amerikës për përfundin e luftës në Kosovë, ishte shkaku kryesor që, atëherë, në vlugun e luftës, të vendosim për emrin e femijës. Kuptohet, nëse do ta mbijetonim luftën. Atëherë jemi betuar se nëse lind djal do ta pagëzojmë Klinton, e nëse lind vajzë, do të ketë emrin e të madhërishmës znj. Albright.

Kjo duhet të bëhëj vetëm për arsye morale, si shenjë falënderimi dhe mirënjohjeje deri në amshim, ndaj miqve tanë amerikanë, që nuk kursyen asgjë vetëm që ta shpëtonin nga shfarosja popullin shqiptar në Kosovë. Pas shtat dështimeve të njëpasnjëshme, kësaj radhe ndodhi mrekullia. Më 01.11.1999, me sectio cesarea, lindi një vajzë ëngjëllore, e cila deshi fati dhe qëndroi në këtë botë dhe ta shijojë jetën në Kosovën e lirë. Vajza ime gjakonte Kosovën e lirë. U lind vështirë, si lind edhe liria. Zoti e bekoi familjen time më lindjen e Medlinës së vogël. Ky fëmijë padyshim është dhuratë nga Zoti në qiell dhe misinonarët e tij në tokë. Menjëherë pas lindjes së vajzës, më lindi ideja të shkruaj një letër në adresë të znj. Albright, ku do ta njoftoja atë se çka më frymëzoi ta pagëzoj vajzën time me emrin e saj. Letra u pranua në States Departëment. Atë ia dorëzoi znj. Albright personalisht z.Ilir Zherka. Eshtë interesante të theksohet edhe një shkrim që u publikua më 21.11.1999, në gazetën e Floridas "S. Petersburg Times", me titull "Foshnja kosovare me emër të Albrightit", i autorës S.T. Martin.

Aty mes tjerash citohet dhe deklarata e zëdhënësit të Shtëpisë së Bardhë, z. James Rubin, i cili deklaron: "Jam i sigurtë se sekretarja Albright do të jetë shumë e prekur kur të njoftohet se një familje kosovare e nderon atë në këtë mënyrë. Pas një kohe të shkurtër pasoi përgjigjia me një letër nga z. Albright, ku ajo shpreh kënaqësinë dhe gëzimin për këtë ngjarje dhe i dërgoi gjithashtu Medlinës së vogël një foto me përkushtim. Foto e kësaj zonje të madhe do të jetë përjetësisht e varur në dhomën e Medlinës, si relikë e çmuar dhe e shenjtë.

BOTA SOT: Po Madelein Bardhi nga Gjakova, si ndjen veten me emërin Madelein Albright nga SHBA?
Dr. Besnik Bardhi: Janë gjëra të habitshme në këtë jetë, Medlina shqiptare nga Gjakova ka qëndrim shumë dinjitoz dhe është shumë e lumtur dhe krenare për emrin e bukur që ka trashëguar nga një figurë e shenjtë në historinë e re të Kosovës, si është z. Albright. Ajo është shumë mirë e informuar kush është kjo zonjë e madhe dhe çfarë rëndësie ka për popullin shqiptar në Kosovë.

BOTA SOT: Si u takuan Medlina amerikane (ish-sekretarja e Shtetit, Madelein Albright) dhe ajo shqiptare (Madelein Bardhi) në Prishtinë, ishte ky takimi i parë apo ka pasë edhe takime të tjera?
Dr. Besnik Bardhi: Ishte gëzim i papërshkruar për familjen tonë, lajmi se do të realizohet takimi i pritur gjashtë vite. Fakti se më në fund do të takohen dy Medlinat zgjonte emocione të jashtëzakonshme. Takimi i parë u realizua në foajen e Pallatit të Rinisë dhe Sporteve në Prishtinë. Nga disa metra larg z. Albright e njohu adashën e saj, Medlinën duke i thënë në anglisht: "Unë jam Medlina dhe ti je Medlina". Pastaj u afrua dhe e përqafoi shumë Medlinën e vogël. "Medlina qenka bërë bukuroshe dhe e rritshme", na tha znj. Albright, derisa po përqafonte trashëgimtaren e emrit të saj. Nga afërsia patëm mundësi edhe unë dhe bashkëshortja të pëshendetemi dhe të komunikojmë me znj. Albright. Në pyetjen time për letren dërguar asaj në vitin 1999, u përgjigj: "Sigurisht më kujtohet". Ky ishte takimi i parë aq shumë i pritur nga ne.

BOTA SOT: Organizatorët e takimit kishin parashikuar që takimi i parë të bëhët në foaje?
Dr. Besnik Bardhi: Po, së pari në foajen e pallatit të Rinisë dhe sporteve në Prishtinë, e pastaj sipas protokollit duhej t'i dhuronte një tufë lule pas fjalimit të saj para publikut të mbledhur aty në afërsi, ku u mbajt një rock koncert i madh për nderë të 4 korrikut Ditës së Pavarësisë së SHBA-ve.

BOTA SOT: Çfarë thonë shokët e shoqet e sajë, të afërmit e tu dhe qytetarët e Gjakovës, po Kosova?
Dr. Besnik Bardhi: E tërë Kosova është e njoftuar që në ditët e pasluftes për Medlinen shqiptare nga Gjakova, nga shtypi vendor dhe ai amerikan. E vërej që të gjithë e thërrasin më shumë dashuri dhe ngrohtësi emrin e saj. Shifet qartë në çdo shqiptim të këtij emri dashuria e pafund për znj. Albright dhe USA. Që nga fillimi të gjithë e kanë aprovuar idenë time për pagëzimin e Medlinës më këtë emër dhe më kanë përgëzuar shumë. Ky emër duhet edhe në të ardhmën të hyjë në përdorim si emër shumë i dashur dhe i çmuar për vajzat e posalindura shqiptare. Medlina ka shumë shoqe, posa e ka përfunduar parashkolloren dhe në shtator starton në klasën e parë, të gjithë ata fëmijë kanë njohuri pse ajo mban atë emër. Të gjithë jemi krenar për te dhe emrin që ajo trashëgoi, jo vetëm familja ime, qyteti im por e tërë Kosova.

BOTA SOT: Çfarë lidhjesh kanë mbetur tani pas takimit të Prishtinës dhe njohja e ish-sekretares së Shtetit, Madelein Albright me Madelein Bardhi nga Gjakova ?
Dr. Besnik Bardhi: Padyshim lidhja shpirtërore me të nuk do të shkëputet përjetësisht, ashtu si nuk do të shkëputët kurrë as miqësia mes Kosovës dhe SHBA-ve. Ne edhe në të ardhmën do të mbajmë lidhje me idhullin tonë, znj. Albright, ajo është pjesë e historisë së Kosovës së re dhe kombit shqiptar. Ajo është në zemrat e çdo shqiptari në Kosovë.

BOTA SOT: Cila është simbolika e këtij emëri, krahasuar me atë çka bëri Amerika për Kosovën ?
Emrat si Presidenti Clinton, znj. Albright, Westley Clark, Woker edhe një herë dëshmuan si në kohën e Presidentit Wilson, se shqiptarët kanë mikun më te shtrenjtë SHBA-të. Dashuria ndaj SHBA-ve në Kosovë është aq madhe sa nuk mund të krahasohet më asnjë shtet tjetër në botë. Medlina, Kosova, Albright, SHBA, patjetër do të jenë mike dhe së bashku deri në amshim.

BOTA SOT: Ju faleminderit, vajzës suaj i urojmë shëndet dhe fat dhe që ajo të rritet së bashku me pavarësinë e Kosovës!
Dr. Besnik Bardhi: Ju falëmnderit juve për këtë bisedë, kënaqësia ishte e imja, këtu edhe një herë mu dha rasti të shpalosi ndjenjat, jo vetem të Medlinës së vogël të familjës sime, por të tërë Kosovës për miqtë tanë dhe për dashurinë që ndjejmë për SHBA-të, si prijetare në mbrojtjen e vlerave demokratike dhe njerëzore në botë. Juve ju dëshiroj suksese në punë të mëtejme.

Webshots - Images of POLIKLINIKA E RE BARDHI MED
Associated Press
Three-year-old Kosovar Albanian girl Madeleine Bardhi, held by her father, Dr. Besnik Bardhi, touches a picture of former U.S. Secretary of State Madeleine Albright, the child's namesake.