Shpërthimi i Majkos si bombë me telekomandë

Ministri i Mbrojtjes Pandeli Majko ia ka mbërritur të rikthehet në qendër të vëmendjes së shtypit në Kosovë, por dhe në Shqipëri, për shkak të refuzimit që i ka bërë një ftese për të shkuar në Mal të Zi, ku do të diskutonte me homologët e ish-Jugosllavisë për sigurinë rajonale dhe zhvillimin e bregdetit. Rikthimi i Majkos për hir të së vërteës ka qenë më serioz se ikjet e tij. Dhe nuk ka qenë serioz pse ka refuzuar një ftesë për në Mal të Zi, por për shkak të vëmendjes që ka dëshmuar për të ndjekur një zhvillim negativ për të ardhmen e Kosovës në Beograd.

Dhe debati duhet mbajtur pikërisht tek ky zhvillim.

Vlera e deklaratës së Pandeli Majkos

Vlera e mirëfilltë që ka qëndrimi i Pandeli Majkos ka të bëjë me faktin se qeveria e Tiranës është tërësisht e papërgjegjshme për ato që po ndodhin në rajon dhe për ato zhvillime që lidhen me Kosovën. Mungesa e vëmendjes së qeverisë së Tiranës në lidhje me zhvillimet në Kosovë, nuk sjell ndonjë dëm të madh për Kosovën, më shumë se sa sjell probleme përqëndrimi i saj në Kosovë. Shqipëria nuk ka asgjë pozitive për të eksportuar në politikën e Kosovës, përveç konflikteve, krizave ciklike, mungesës së stabilitetit dhe lidhjes së politikës me krimin. Ishte një kohë që Tirana ishte shumë e vëmendshme për të diktuar në Kosovë dhe bilanci i politikës së brendshme në Kosovë është së paku 10 vrasje të karakterit politik dhe një lloj kriminalizimi i shoqërisë përmes liçensave politike.

Por rasti Majko dëshmon se pavarësisht faktit që Kosovës i ka rënë për pjesë një "shtet amë" i keq, nuk është e vërtetë se mungesa e vëmendjes së Tiranës për Kosovën është diçka e mirë. Serbët dëshmun se ditën të përdorin dhe vëmendjen e madhe të Tiranës për Prishtinën dhe mungesën e vëmendjes së Tiranës për Prishtinën. Në rastin e parë ata vunë kujen se Tirana po gllabëron Prishtinën, ndërsa tani po përpiqen t'i tregojnë kufirin Tiranës.

Deklarata e Majkos ka vlerë se e mediatizoi këtë çështje dhe po detyron opinionin publik ta konsiderojë seriozisht rrezikun e këtyre zhvillimeve.

Spekullimi i Majkos dhe spekullimi me Majkon

Spekullimi me deklaratën e Pandeli Majkos nuk ka të bëjë me atë që ai kundërshton por me refuzimin që ai i ka bërë një ftese për të shkuar në Mal të Zi. Kushtetutën e re të Serbisë dhe Malit të Zi e kritikoi para Pandeli Majkos edhe opozita në Tiranë. Por Majko dhe ato që po përpiqen të glorifikojnë deklaratën e Majkos duan të krijojnë idenë se kemi përpara një hero që po mbron Kosovën nga bajlozi i zi që ka dalë prej detit. Në të vërtetë, si Sali Berisha si Pandeli Majko që kanë bërë deklarata të qarta kundër përpjekjeve serbe për të sanksionuar në kushtetutë sovranitetin e tyre mbi Kosovën, në të vërtetë nuk kanë bërë asgjë më shumë se sa propagandë patriotike me përdorim të kufizuar në politikën e brendshme të Tiranës dhe pak eufori në Kosovë. Nëse ka një politikë realiste që rrit sigurinë se Kosova duhet të jetë shtet i pavarur, është formimi i autoritetit të pushtetit të shqiptarëve në Prishtinë. Përpjekja për të vënë alarme nga Tirana për atë që mund të ndodhë në Beograd kundër Kosovës, vlejnë vetëm kur kjo gjë kërkohet nga autoriteti politik dhe shtetëror i Kosovës. As Majko, dhe askush tjetër në Tiranë, nuk mund t'i garantojë një siguri artificiale Kosovës dhe një imunitet ndaj rreziqeve që vijnë nga Beogradi, nëse nuk sigurojnë një nxitje dhe rritje të autoritetit shtetëror në Kosovë. Nëse ka vërtet alarm në Kosovë, ai duhet të vihet nga Ibrahim Rugova, Bajram Rexhepi, Nexhat Daci nga grupet parlamentare të Prishtinës dhe Tirana duhet të përcjellë zërin legjitim të tyre. Tirana, e cila nuk i ka pyetur kosovarët kur ka shkuar në Beograd, nuk ka pse vajton e para për perversitetet politike të Beogradit me Kosovën. Nuk ka rrugë për të mbrojtur Kosovën me deklarata patriotike përveç rrugës që na çon tek pushteti legjitim i Kosovës. Biles nëse u ka dhënë dikush hov deklaratave serbe kundër Kosovës këto ditë, është ilustrimi që Ministri i Mbrojtjes së Shqipërisë është vënë në dispozicion si patriot për Kosovën, ndërkohë që është në krizë me Presidentin e Republikës që nuk i pranon trupat greke që kërkon të na sjellë në Bisht-Pallë ministri Majko. Është ironi e madhe të konsiderojmë se Pandeli Majko po ndihmon Kosovën me këtë qëndrim. Dhe nëse Zoti na jep fuqi të na ruajë nga paranojat, më duhet të them se pas deklaratës së Majkos, serbët kanë gjetur deklaratën e porositur për t'u shtirur edhe më luftarakë për Kosovën.

Edhe një herë për patriotizmin e dyshimtë të Pandeli Majkos

Mund të mos i kthehesha më biografisë shtetërore të Pandeli Majkos, po të mos kisha hetuar entuziazmin e Veton Surroit për "atdhetarizmin" e tij. Për të filluar nga meritat "taksa Majko" është mbledhur vërtet në një masë që mund t'ia kenë thënë zotit Surroi, por lajmi i vërtetë është se ajo është harxhuar dhe nuk figuron më në buxhetin e shtetit si taksë më vete, por si taksë e shpërdoruar për shpenzime buxhetore. Vetë Majko është detyruar ta pranojë këtë publikisht si një dështim. Por për të shkuar më tej tek historitë e Pandeli Majkos me atdhetarizmin, më duhet të kujtoj se ne kemi sot një problem gjigant në Portin e Durrësit me çisternat greke, të krijuar nga Pandeli Majko, kemi një monopol të Greqisë mbi tregun e brendshëm që është meritë e Pandeli Majkos, kemi një projekt të shkatërruar të "Korridorit 8", ku e ku, larg rrugicës Durrës - Prishtinë që është vepër e Pandeli Majkos dhe një debat ende të pambyllur për dislokimin e trupave greke në Bisht-Pallë. Më tej akoma në këtë histori është e nevojshme minimalisht të hetohen rrethanat që e detyruan Pandeli Majkon të shpërthente kundër një takimi gati rutinë dhe të arsyetohej për këtë me kushtetutën që po hartohej në Beograd. Një ministër normal që e bën këtë gjest është me të vërtetë një simbol i atdhetarisë, qoftë dhe si pakicë nëse atij ia refuzon qeveria vullnetin e vet. Por ama kur nuk gjen më shteg brenda qeverisë. Pandeli Majko para se të bënte deklaratën, nuk i ka bërë asnjë telefonatë Luan Hajdaragës që ushtron detyrën e Ministrit të Jashtëm, asnjë telefonatë Ermelinda Meksit që zëvendëson Fatos Nanon, i cili dëfrehet plazheve të Mesdheut me nusen e re, asnjë telefonatë Presidentit të Republikës që, së paku, patriot është qoftë dhe për faktin se nuk lejon ushtrinë greke të Pandeli Majkos të dislokohet në Bisht-Pallë. Për të mos vajtur në takimin e Malit të Zi kishte dhjetëra arsye dhe Pandeli Majkoja mund të thoshte edhe faktin që kishte djalin me temperaturë, se e ka thënë edhe tjetër herë!