Nënë Tereza dhe "Megjithatë"

Në ceremoninë që u zhvillua në shkollën e mesme “Teodor Rusvelt” në Jankes në Nju Jork, me rastin e mbarimit të vitit shkollor në vitin 2002, diku nga mesi i programit, një prej drejtueseve, pasi thirri një nxënëse, filloi sikur po recitonte: "Ndershmëria dhe sinqeriteti të bëjnë të brishtë" dhe nxënësja, e thirrur pranë saj, iu përgjigj: "Ji i ndershëm dhe i sinqertë, megjithatë". "Të kujt janë këto mendime", -pyeti drejtuesja. "të Nënë Terezës" -iu përgjigj nxënësja. "Pa dyshim", -tha drejtuesja. Dhe më pas ato së bashku recituan të gjithë poemën e shkurtër të Nënë Terezës, "Megjithatë" e cila u duartrokit nxehtësisht. Poema ishte vërtet një koncentrat mendimi e urtësie i shkallës më të lartë. Ajo përmblidhej në tetë rreshta dhe kishte të bënte me sjelljen e mirë në një botë të keqe. Nuk e kisha dëgjuar kurrë atë, ndonëse dija një tjetër poemë të ngjashme, apo gjerdan maksimash, po të Nënë Terezës, që quhej "Jeta".
Pasi dëgjova poemthin, mësova se origjina fillestare e atyre vargjeve duhet të këtë ardhur nga feja indiane, Xhain, e cila është një fe me parime shumë interesante, ndërmjet të cilave ajo përmban edhe idenë e "Ahimsa" që do të thotë "pa dhunë" dhe që ka frymëzuar lëvizje të mëdha përparimtare botërore të shekullit që lame pas. Ajo është rreth 5000 vjet e lashtë, por nuk është përhapur shumë. Në citatet që jepen për të njëjtin subjekt nga ajo fe, përveç vargjeve që përmbahen në poemën e Nënë Terezës janë edhe dy vargje të tjera që nuk ndodhen në thëniet e saj. Ato janë: "Njeriu më i lartë me idetë më të shquara, goditet nga njeriu më i ulët me idetë më të errëta - Përpiqu të bëhesh i lartë, megjithatë" si dhe "Në qoftë se mendon ndryshe, mund të kritikohesh nga masat - Përpiqu të mendosh ndryshe, megjithatë". Mundësinë më të madhe të prejardhjes ato vargje duket se e kanë pikërisht nga kjo fe, por Nënë Tereza u dha atyre një përhapje dhe njohje universale.
Në vitin 1966 një udhëheqës studentësh në Amerikë me emrin Kent Keith, shkruajti një pamflet për udhëheqës të tjerë të studentëve që u quajt "Revolucioni i qetë". Në këtë pamflet u paraqitën disa maksima që u quajtën "Komandamente paradoksale". Janë gati të njëjta me ato që i atribuohen Nënë Terezës. Në vitin 2001 ato u riparaqitën në librin e tij "Komandamentet paradoksale: të gjeturit e kuptimit personal në një botë të çmendur". Në këtë libër tetë rreshta janë si të Nënë Terezës, një është personal dhe një është si ai i fesë Xhain.
Nënë Tereza fillimisht ato vargje i kishte vendosur në një mur të shtëpisë së të vegjëlve jetimë, Shishu Bhaven, në Kalkuta. Ato vargje sot gjenden të vendosura kudo nëpër botë: në mure, në zyra, në dyer frigoriferi, në dollape etj. Ndikimi i tyre në edukimin moral të popullit, duket se është i fuqishëm. Shumë ia atribuojnë ato vargje Nënë Terezës. Uein Daier (Waine Dyer) i quan ato si "Plani me tetë pika për shndotizim" i Nënë Terezës, "Megjithatë":

- Njerëzit janë të paarsyeshëm, të palogjikë dhe egoistë. Duaji ata, megjithatë!
- Kur bën mirë të tjerët të akuzojnë se nisen nga egoizmi. Bëj mirë megjithatë!
- Në sukses fiton miq të rremë dhe armiq të vërtetë. Përparo, megjithatë!
- Të mirën që bën sot, do të ta harrojnë nesër, bëj mirë megjithatë!
- Ndershmëria dhe sinqeriteti të bëjnë të brishtë. Ji i ndershëm dhe i sinqertë, megjithatë!
- Atë që ndërton me vite, mund të ta shkatërrojnë brenda natës. Ndërto, megjithatë!
- Njerëzit duan ndihmë, por mund të të godasin. Po ti ndihmoji njerëzit, megjithatë!
- Jepi botës më të mirën që ke dhe ajo do të të thyejë dhëmbët. Jepja botës më të mirën që ke, megjithatë!