Moisiu: Pse s’ua dhashë grekëve Bishtin e Pallës

-- nga Bledar Hoti

“Marrëveshja e Bishtit të Pallës mes Greqisë dhe Shqipërisë ka pasaktësi në formulimet juridike”

TIRANË - Marrëveshja e Bishtit të Pallës mes Greqisë dhe Shqipërisë ka pasaktësi në formulimet juridike. Presidenti i Republikës, Alfred Moisiu, jep për herë të parë arsyet e kthimit në parlament të ligjit që ia lë Greqisë bazën ushtarake të Bishtit të Pallës për një periudhë kohore 6-vjeçare. Nëpërmjet zëdhënëses Afërdita Sokoli, Moisiu bëri publike shkaqet e kthimit të marrëveshjes ushtarake mes Greqisë dhe Shqipërisë, të shoqëruar me argumentin përkatës juridiko-kushtetues. Gjithashtu, kreu i shtetit ka kërkuar mospolitizimin e kësaj çështjeje, duke kërkuar në radhë të parë njohjen e argumenteve juridike të institucionit, që ai drejton për ligjin e kthyer në adresë të parlamentit. “Ditët e fundit, mjetet e ndryshme të informacionit masiv dhe disa politikanë të pozitës dhe të opozitës kanë shprehur opinionet e tyre rreth këtij qëndrimi institucional të Presidentit të Republikës. E përbashkëta e këtyre prononcimeve është kryesisht mosnjohja e argumenteve të paraqitura nga Presidenti dhe ripërsëritja e qëndrimeve politike të mbajtura në Kuvendin e Shqipërisë gjatë debatit për këtë çështje”, - thuhet në deklaratën për shtyp.

Kthimi
“Ligji i miratuar për ratifikimin e marrëveshjes ndërqeveritare për punimet civile në bazën ushtarako-detare në Bisht–Pallë ka pasaktësi në formulimet juridike të përdorura. Çdo qëndrim tjetër i natyrës politike, i evokimit të historisë dhe i problemeve të reja e të vjetra në marrëdhëniet midis dy vendeve, kërcënimi për rreziqet humanitare të mundshme dhe trajtimi thjesht teknik, reflekton mosnjohje të argumenteve të përdorura në dekretin presidencial për kthimin e ligjit përkatës si dhe qëndrime personale të individëve dhe të palëve të interesuara”, - thuhet në deklaratën e Presidencës. Njëkohësisht, Moisiu, me anë të kësaj deklarate, i cilëson qëndrimet e mbajtura nga politikanë të ndryshëm si mosnjohje të vendimit të tij, mbi të gjitha të argumenteve juridike që i sillen kuvendit nëpërmjet kthimit të këtij ligji. Presidenti ftoi dje klasën politike shqiptare t’i gjykojë me maturi arsyet e kthimit të këtij ligji, pa u ndarë në dy kampe të kundërta. “Presidenti i Republikës e vlerëson si të panevojshëm politizimin e ushtrimit të kësaj të drejte të tij kushtetuese. Me këtë rast ai sugjeron, që forcat e grupimet e përfshira në debat si dhe protagonistët e jetës politike në vend të veprojnë me maturi dhe përgjegjshmëri, për të mos dëmtuar procesin e konsolidimit të institucioneve të shtetit ligjor në vend dhe përpjekjet sistematike për anëtarësim në NATO dhe integrim në BE”, - thekson deklarata e kreut të shtetit. Që nga koha e ushtrimit të detyrës së tij si President, Moisiu për herë të parë del kundër vendimeve të parlamentit, duke kthyer mbrapsht një marrëveshje mes dy shteteve, Shqipërisë dhe Greqisë. Siç dihet, pas firmosjes dypalëshe për Bishtin e Pallës, për çdo ndërhyrje të vetë personelit shqiptar në bazë, qoftë edhe për një zgjerim të domosdoshëm, duhet marrë më parë pëlqimi i palës greke. Kjo, por dhe detyrimi që anijet e NATO-s të marrin leje tek ushtarët grekë para se të hyjnë në bazë, duken se kanë qenë dy arsyet kryesore të kthimit të ligjit në kuvend.

Neni 11
Personeli palës greke që do të bashkëpunojë me palën shqiptare për zbatimin e punimeve
Pala greke do të caktojë një oficer ndërlidhës gjatë përgatitjes së studimeve dhe zbatimit të punimeve. Anijet e flotës greke, të cilat do të vizitojnë zonën për qëllim trajnimi operacional, ose në kuadrin e marrëdhënieve dypalëshe, ose gjatë operacioneve në kuadrin e marrëdhënieve dypalëshe, ose gjatë operacioneve PfP/CRO, ose NATO, do të kenë të drejtën e ankorimit në bazë dhe të përdorimit të vendankorimit, si dhe të kryejnë riparime lehtësuese, pas njoftimit me shkrim.
Detajet për prezencën e anijeve të Flotës Greke në bazë do të përcaktohen në një protokoll të veçantë bashkëpunimi midis flotave shqiptare dhe asaj greke.

Zbardhen motivet e kthimit të ligjit për bazën detare të Bishtit të Pallës

Moisiu: E dyshimtë prania e anijeve greke në bazë

TIRANË - Prania e anijeve ushtarake greke për qëllime operacionale dhe riparimi në bazën e Bishtit të Pallës shkel në parim pikat e marrëveshjes mes Ministrisë së Mbrojtjes të Shqipërisë dhe asaj të Greqisë. Presidenti i Republikës, Alfred Moisiu ka nxjerrë këtë përplasje në marrëveshjen mjaft të debatueshme të Bishtit të Pallës, si një nga shkaqet e vetme të kthimit mbrapsht të ligjit për rishqyrtim nga ana e Parlamentit. Presidenti Moisiu i kërkon Parlamentit rishikimin e dy neneve 11 dhe 16 të marrëveshjes së Bishtit të Pallës me Greqinë. Kreu i shtetit nëpërmjet një shkrese të veçantë, të shoqëruar me marrëveshjen mes Ministrive të Mbrojtjes të Greqisë dhe Shqipërisë, i kërkon deputetëve të Kuvendit të rishikohen këto dy nene, me argumentimin ligjor për kthimin e rishqyrtimin e saj.

Neni 11
Pikat më të kontestuara tek ky nen janë në paragrafin e dytë, ku në pjesën e parë theksohet se “anije të flotës greke, të cilat vizitojnë zonën në kuadër të marrëdhënieve dypalëshe apo në kuadër tjetër”. Sipas presidentit, “një pikë e tillë e marrëveshjes nuk përcakton se për çfarë flote bëhet fjalë, ushtarake, tregtare etj." Gjithashtu, një nga kontestimet e tjera në lidhje me paragrafin dy të këtij neni është ankorimi i anijeve greke për qëllime riparimi. “Në bazë të këtij paragrafi, anijet e flotës greke do të kenë të drejtë të ankorohen në bazë për të kryer riparime lehtësuese. Gjykoj se duhet saktësuar, se cilat do të quhen riparime lehtësuese, pasi “lehtësuese” është term i interpretueshëm, që ka nevojë për saktësime të mëtejshme”, - thuhet në dekretin me numër 3798 të Presidentit të Republikës. Gjithashtu një pikë tjetër e nenit 11 të kësaj marrëveshjeje, e cila mundëson flotën shqiptare dhe atë greke, “të lidhin protokoll bashkëpunimi, për të përcaktuar detajet për prezencën e anijeve greke në këtë bazë”. “Gjykoj se ky paragraf lë shteg për interpretime të ndryshme. Ai mund të interpretohet në mënyrë të zgjeruar, duke dalë jashtë objektit të marrëveshjes, në një kohë që ajo përcaktohet në tre raste, a) trajnime operacionale, b) marrëdhënie dypalëshe dhe c) operacionale NATO ose PfP/CRO. Vetëm në këto tre raste anijet e flotës greke do të hyjnë në Shqipëri dhe në Bisht Pallë dhe nuk del nevoja për një protokoll të veçantë bashkëpunimi. Nëse ky paragraf zbatohet, gjykoj se do të ishte në kapërcim të objektit të marrëveshjes. Ndërkohë që Flota Shqiptare nuk ka tagër kushtetuese për të lidhur marrëveshje apo protokolle bashkëpunimi me jashtë”, - theksohet në dekretin e Moisiut.

Neni 16
Sipas argumentimit ligjor, kreu i shtetit e cilëson si një përplasje mes nenit 1 dhe 16 të marrëveshjes së Bishtit të Pallës me palën greke. Sipas marrëveshjes, qëllimi i saj është fillimi dhe përfundimi i ndërtimit të punimeve në një kohë 5-vjeçare, me një rinovim automatikisht të saj prej një vit. “Nisur nga sa më sipër, ka vend të saktësohet përputhshmëria e nenit 1 dhe nenit 16, pra nëse afati i punimeve zgjat deri në 5 vjet, është më i shkurtër, apo nënkupton edhe përdorimin e bazës në kuadër të marrëdhënieve dy apo më shumë palëve”, - theksohet në këtë dekret.