Fillimisht nga Kori i burrave të Gjakovës u këndua Himni Kombëtar dhe ai "Kur n'Kosovë ra kushtrimi" nga nxënësit e Gjilanit, dhe më pas me një minutë heshtje u nderua profesori i ndjerë Fehmi Agani.
Presidenti i Kosovës Ibrahim Rugova, duke e përshëndetur këtë akademi përkujtimore tha:
"Sot të gjithë ne, gjithë Kosova ndiehet krenare me profesor Aganin, me veprën dhe figurën e tij. Profesor Agani ishte Burrë i madh i Kosovës. Njeri me mendje dhe zemër të madhe, siç e njohim dhe siç e dimë të gjithë. Profesor Agani ishte dhe do të mbetet Heroi i Kosovës. Tërë jetën dhe veprën ia kushtoi lirisë dhe pavarësisë Kosovës", theksoi në fjalën e tij Presidenti i Kosovës, duke përshëndetur këtë akademi përkujtimore kushtuar profesorit të dashur dhe kujtimit të tij.
Gjithashtu Presidenti Rugova falenderoi organizatorin, FR të LDK-së dhe Kryesinë e LDK-së dhe qytetarët e Kosovës, por edhe artistët, studentët që e madhëruan profesor Aganin me programin e tyre.
Duke përmbyllur fjalën e tij presidenti Rugova tha se është një thënie e njohur se profesorët nuk vdesin kurrë, sepse i lanë pas njerëzit e gjallë, nxënësit e tyre.
Presidenti Rugova njoftoi me këtë rast se vitin e ardhshëm do të ndahet për herë të parë Çmimi Fehmi Agani, i themeluar para dy vjetësh. Ky çmim do t'u ndahet çdo tri vjet personaliteteve të shqura kombëtare dhe ndërkombëtare.
Zoti e bekoftë Fehmi Aganin, zoti e bekoftë familjen Agani, zoti e bekoftë Kosovën, tha në fund Presidenti Rugova. Ndërkaq Rexhep Ismajli, kryetar i Akademisë së Shkencave dhe të Arteve të Kosovës tha se në opinionin shkencor e kulturor shqiptar, figura e akademik Fehmi Aganit njihet për veprimtarinë e tij shkencore, kulturore, shoqërore e politike, gjerësisht emancipuese. "Krijimtaria e tij intelektuale është shtrirë më konkretisht në fushat e sociologjisë, të sociologjisë politike dhe të filozofisë së politikës, të raporteve shoqërore, të lëvizjeve çliruese dhe çlirimtare, të grupeve dhe partive politike, etj. Studiuesit dhe specialistët e këtyre fushave e kanë shquar cilësinë dhe thellësinë e studimeve dhe të ndihmesave të rëndësishme të akademik Aganit, në shkallën e vlerësimit 'në fushat e dijeve sociologjike dhe politike, kontributi i Fehmi Aganit zë vendin më të spikatur në kulturën shqiptare të pjesës së dytë të shekullit të kaluar", tha akad. Ismajli.
"Nga fillimet e deri në fund të jetës së tij është konstante vija e angazhimit intelektual në drejtim të argumentimit të njësisë historiko-shoqërore shqiptare megjithë ndarjet arbitrare dhe kufizuese shtetërore. Paralelisht me shkrimet që kanë impakt të drejtpërdrejt në jetën tonë shoqërore, ai ka botuar një bllok studimesh me vlerë sociologjiko-politike për proceset e participimit të punëtorëve në vendimmarrje, pastaj për proceset shoqërore-politike në Shqipëri gjatë Luftës II Botërore, për veprimtarinë e partive politike. Historia e mendimit sociologjik është një nga fushat që e preokupoi gjatë Fehmi Aganin. Më pastaj vëmendjen e tij krijuese e tërhiqte hapësira e madhe e shoqërisë civile dhe e raporteve të demokratizimit", nënvizoi Rexhep Ismajli.
Ndërkaq duke folur për veprimtarinë politike të prof.Aganit, Rexhep Ismajli tha: "Interesimet intelektuale dhe shkrimet e akademik Aganit përqëndrohen në argumentimet dhe shjegimet serioze politike të të drejtave shqiptare dhe të Kosovës, në projektimet e lëvizjeve konkrete politike, në projektimet dhe argumentimet e pavarësisë shtetërore e shtetformuese të Kosovës dhe përhapjen e këtyre ideve; tashmë është thënë se akademik Aganit i detyrohet shumëçka në fushën e krijimit, mbarështrimit dhe nyjtimit të argumenteve dhe të diskursit argumentues konsistent mbi të drejtën e vetëvendosjes për Kosovën dhe rrugët e realizimit të këtij qëllimi; ana tjetër gati paralele me këtë ka të bëjë me çështjet e organizimit të jetës shoqërore, me organizimin e shoqërisë civile dhe me proceset e demokratizimit".
Në vazhdim akad. Ismajli foli për veprimtarin e akademik Aganit dhe rolin e tij të rëndësishëm themelvënës, në punën e tij si veprimtar universitar dhe si studiues: në proceset e mëvetësimit të Universitetit të Prishtinës, në zgjerimin e rrjetit studimor dhe institucional të arsimit të lartë, në drejtimin e fakulteteve, në themelimin e Institutit Albanologjik, në themelimin dhe drejtimin e Degës së Sociologjisë-filozofisë, në drejtimin e revistave Studia humanistica, Thema, etj.
Është me rëndësi të theksohet, tha akad. Ismajli, këmbëngulja e profesor Aganit në gjetjen e formave dhe në krijimin e rrethanave për integrimet shqiptare, duke cekur si sukses simbolik e konkret të tij nxitjen dhe organizimin e Konsultës Gjuhësore të Prishtinës të vitit 1968.
"Në fillim të viteve të '90-ta akademik Fehmi Agani është në kreun e lëvizjes së madhe politike për pavarësinë e Kosovës, kreator i ideve e nxitës i proceseve përtej suazave partiake", theksoi z.Ismajli, duke shtuar se profesor Agani gjatë ktyer viteve është i pranishëm në manifestimet e ndryshme, në kontaktet intensive me gazetarë e diplomatë të huaj, i dhënë pas shpjegimit, argumentimit të arsyeve për pavarësinë e Kosovës.
"Dora e tij hetohet qartë në hartimin e dokumenteve për lëvizjen politike në Kosovë në dekadën e fundit. Njëkohësisht ai ngulte këmbë në selitjen e lidhjeve miqësore të shqiptarëve me popujt përreth", tha akad.Ismajli, për të vazhduar:
"Refleks i drejtpërdrejtë i ideve të Aganit për këto çështje më duket kërkesa që në këtë proces të ndërlikuar të shoqërisë sonë të mos krijohen kuazidilema si ato lidhur me epërsinë e realizimit të standardeve para statusit ose e kundërta. E qartë, njëra dhe tjetra duan ndërtuar paralelisht, madje në mënyrë të ndërthurrur".
Në përmbyllje të fjalës së tij akad. Rexhep Ismajli tha se "vepra e akademik Fehmi Aganit përmban në vete gjithnjë ide dhe mendime aktuale e të gjalla dhe ky është një prej dimensioneve që atë e bëjnë një nga figurat më të rëndësishme shkencore, kulturore dhe shoqërore të Kosovës dhe të botës shqiptare". "Figura e tij shkrinte në një mendimtarin humanist dhe intelektualin e angazhuar, për të krijuar kështu vizione dhe horizonte".
"Përtej rezultateve me peshë në fushën e dijes, akademik Fehmi Agani do të mbahet në mend për breza e breza edhe për rrezatimin njerëzor që buronte nga mendja dhe sjellja e tij krejtësisht e veçantë".
Në vazhdim të akademisë përkujtimore, aktorët e Teatrit Kombëtar interpretuan një lojë shumë impresive skenike me motive të qëndresës, të përcjellë me një muzikë shungulluese kushtuar profosor Aganit, në regjinë inventive të Selami Tarakut, me interpret kryesor, balerinin veteran, Ahmet Brahimaj.
Ndërkaq aktorët Dibran Tahiri dhe Edona Reshitaj deklamuan pjesë të deklaratave, fjalimeve dhe intervistave të profesor Aganit.