"Sigurimi i shtetit dhe komunistët po drejtojnë sot shtetin"

Intervistë me ish-studentin e Dhjetorit, përfaqësues i LIS '90, Shpend Jeshnica

Z. Jeshnica, si përfaqësues i LIS '90, si e gjykoni ju në këtë moment ligjin për hapjen e dosjeve të Sigurimit?

Është e turpshme që pas 18 vitesh pluralizëm në Shqipëri nuk janë hapur dosjet. Sigurimi i Shtetit dhe komunistet e Enverit sot drejtojnë gjykatat, prokurorinë, një pjesë e madhe e tyre janë në parlament, një pjesë në kabinetin qeveritar. Partitë, të gjitha, në Shqipëri janë krijuar dhe drejtohen nga komunistët dhe ish-Sigurimi i Shtetit. Sigurimi i Shtetit ka vepruar si klan mafioz në Shqipëri, duke mbështetur ish-komunistët.

Ju thoni që partitë i krijuan komunistët dhe Sigurimi, po PD?

PD u krijua nga studentët e Dhjetorit të mbështetur nga pedagogët, intelektualët dhe populli i Tiranës, por, siç e dini, më vonë edhe PD e uzurpuan komunistët. Kryetari i parë i PD dhe gjysma e kryesisë ishin studentë. Shumë shpejt Azem Hajdari u hoq si kryetar e më pas u vra. Asnjë nga studentët, ish-anëtarë të kryesisë së parë të PD, nuk ndodhen më në nivele drejtuese në PD, qoftë dhe në Këshillin e saj Kombëtar. Studentët e Dhjetorit e paguan me gjak pluralizmin në Shqipëri.

A mos ju duket që e teproni pak ose, thënë ndryshe, jeni pak ekstremist?

Jo aspak. Kur flitet për fenomene, duhet folur me fakte. Në fillim u vra Arben Broci, pastaj u larguan gjithë studentët nga PD. Një pjesë u kërcënuan me jetë dhe u detyruan të ikin nga Shqiperia. Kjo vazhdoi me largimin e Shenasi Ramës, Arben Sulës, Alma Bendos, Arben Likës e Tefalin Malshytit. Të gjithë u detyruan të lënë Shqipërinë. Dhe vendin e tyre e zunë "Vullnetarët e Enverit" (që sot janë ministra), sigurimsat e sekretarët e Partisë së Punës.

Cili është ndryshimi mes së majtës e së djathtës në raport me Dhjetorin e në raport me Sigurimin e Shtetit?

E majta është trashëgimtare e partisë gjakatare të E. Hoxhës. Ata nderruan vetëm emrin nga Parti e Punës në Parti Socialiste, dhe mbartën me vete atë trashëgimi të shëmtuar 45-vjeçare. Ish-ministra të '90, që vranë Arben Brocin, drejtojnë sot PS. Në PS u munduan të sajojnë dhjetorista dhe ia arritën, kurse në PD u munduan t'i eliminojnë ata dhe prapë ia arritën. Është për të ardhur keq që asnjë prej studentëve të Dhjetorit, që sollën pluralizmin në Shqipëri, nuk ndodhet në parlament ose në kabinetin qeveritar. Sot në parlarnent gjenden komunistë e punonjës të Sigurimit, shoferë, ish-bodyguard-ë dhe njerëz me 4 klasë shkollë dhe asnjë lider i studentëve të Dhjetorit.

A jeni për hapjen e dosjes së Azem Hajdarit?

Patjetër që po. Vrasja e A. Hajdarit është vrasje e pastër politike. Në atë vrasje ishte i angazhuar gjithë shteti shqiptar. Kurse gjykata e ka quajtur vrasje ordinere. Është turp për ata që drejtojnë PD, që shkojnë e çojnë buqeta me lule te busti dhe nuk zbardhin vrasjen e tij, e cila ishte dhe premtim elektoral. Në atë vrasje ështe i implikuar shteti dhe shumë politikanë në Shqipëri.

Ju thoni që politika në Shqipëri është e inkriminuar dhe e korruptuar?

Po të marrësh filmimet e '97, do të shohësh kush shoqëronte liderit e partive politike. Janë banda, të cilat me pas bënë masakra. Bodyguard-ët e liderëve të partive politike janë të denuar për vrasje. Kurse sot janë në modë hajdutët me doreza, ministra që kanë bërë masakra si e Gërdecit e vjedhje si rruga Durrës-Kukës.

Po të vijë e majta në pushtet, a mendoni që do të ketë ndryshime pozitive?

Edi Rama është i lidhur me mafien e ndërtimit. Ai është peng i Sali Berishës e Gramoz Ruçit. Rama sillet me partinë e tij si diktator, e si mund të jetë demokrat në pushtet?! Rama është një hibrid modern, njeri i korruptuar me sjellje diktatoriale. Shqipërinë nuk do ta ndryshojë as Rama, as Berisha, po një klasë e re politike që po edukohet në Perëndim, e cila e ka të nevojshëm bashkëpunimin me studentët e Dhjetorit '90, dhe imponimi i komunitetit nderkombëtar për t'u integruar në strukturat euro-atlantike.

PD po rigrupohet. Si e mendoni ju këtë riorganizim apo rithemelim të PD?

Shqipëria ka nevojë vetëm për dy parti, por ato duhet të jenë demokratike në organizimin e tyre të brendshëm. Në PD nuk ka demokraci të brendshme, e si mund të ndërtojë PD një shtet demokratik pa struktura të brendshme demokratike? Ka ardhur koha që PD ta drejtojnë studentët e Dhjetorit, megjithëse tani kjo është një utopi. Kush kthehet në PD, kthehet si servil aktiv, ndërkohë servilë pasivë ka plot dhe atyre tani iu ka dalë boja, e nuk vlejnë më. Kështu, Berisha kërkon t'i zëvendësojë me të mëparshmit, pasi i duken më elegantë e më të besueshem për të tjerët, dhe gjoja kështu bëhet me demokratike partia.

Mendoni që PD pas 18 vjetësh nuk është demokratike?

Le t'i kthehemi PD në pozitë dhe në opozitë. Në vitin 1992-1997 në Shqipëri u vendos një diktaturë e bardhë, e tipit aziatik, ku si model u mor Malajzia. Çfarë ndodhi në këtë kohë në Shqipëri? U krijua një model shteti joperëndimor, të cilin shqiptarët nuk e pranonin dot, dhe si pasojë erdhi përmbysja e atij regjimi, që fatmirësisht nuk zgjati më shumë se 5 vjet, por u përmbys nga populli me revolta.

Diktaturë e bardhë, a na e shpjegoni pak këtë periudhë të qeverisjes së PD?

Në një diktaturë të bardhë suprimohen pushtetet dhe kontrollohet çdo gjë. Kontrollohet ekzekutivi, legjislativi, gjykatat, prokuroria, bankat, mediet, partitë politike, vidhet vota e eliminohen kundërshtarët politikë që të mos ketë më konkurrence, dhe biznesi është tërësisht nën kontroll. Policia bën represion policor, dhe bëhet vetëm propagandë shtetërore nën kontrollin e presidentit që është fuqiplotë mbi gjithçka.

Gjëja e parë qe bëhet kur merr pushtetin, merren masa që të eliminosh opozitën. U morën masa dhe kjo punë u bë në Shqipëri në atë kohë. Lideri i opozitës u fut ne burg, partitë e majta i ndanë në dy-tri parti, kurse partitë e djathta i shpërbënë: Demokristianët në tri parti, Balli Kombëtar në tri parti, Legaliteti në tri parti (Familja Mbretërore nuk u la të hynte në Shqipëri, Mbretin e ndaluan dhe e detyruan të lërë Shqipërinë). Sindikatat i ndanë në tri pjesë, të persekutuarit po në tri pjesë. Po ashtu, dhe studentët e Dhjetorit i detyruan të largoheshin nga Shqipëria. Ekzekutivi (qeveria) u suprimua nga Presidenca, 17 ministra drejtoheshin nga 17 këshilltarë të presidentit. Gjykatat u mbushen me gjyqtarë me kurse 6-mujore.Tri banka kishte Shqipëria në atë kohë, Dardania Bank, Arabia Bank, dhe Malaysian Bank, të gjitha kontrolloheshin po nga Presidenca.

Gazeta "Koha Jonë" u dogj dhe gazetarët u arrestuan. Duhej suprimuar dhe parlamenti dhe kjo pune u bë, u vodhën votat në zgjedhjet e vitit 1996, dhe në parlament hynë kukulla të komanduara nga Presidenca. Policia sekrete (SHIK, 1992-1996), u përdor për të realizuar këto objektiva e për të eliminuar fizikisht kundërshtarët e regjimit.
Kjo është mënyra që të mban në pushtet për më se 25-30 vjet, siç ka ndodhur në Malajzi, Indonezi e në shumë vende aziatike e pastaj pushteti i kalon trashëgimtarëve, të qeverisin pa vështirësi, pasi tashmë janë dhe ekonomikisht të fortë. Ky regjim u vendos në Shqipëri në vitet '92-'97, që desh Zoti e nuk shkoi më gjatë.

Si e gjykoni qeverisjen e PS?

Është periudyha e korrupsionit dhe e qeverive të korruptuara. Në këtë periudhe filluan bandat, politikanet e banditët hanin e pinin bashkë, votat u morën me eskorta makinash si në disa vende të pazhvilluara të Afrikës, e kutitë e votimit i ruanin kriminelët e armatosur. Në këtë kohë Shqipëria radhitej ndër vendet më të korruptuara të botës, dhe 90% te bizneseve i kontrolluan njerëzit me precedentë kriminalë, e tenderat i përfitonin militantët. Është dhe koha e vrasjeve politike. Pas shkatërrimit të shtetit në '97, disa institucione filluan të ndërtoheshin, u zhvilluan banka e media private. Komunitetit Evropian filloi të monitorojë nga afër proceset demokratike në Shqipëri. Por panorama e zgjedhjeve është Bushati, ku nuk ka konkurrencë politike, po përplasje bandash, thyerje kryqesh, e policë të armatosur me kuti votimi në duar. Ky është imazhi, me të cilin largohesh nga vendi yt i dashur, Shqipëria.

Pse thoni largohesh, ju kanë detyruar të largoheni nga Shqipëria?

Po, isha i detyruar të largohem, që të shpëtoja veten dhe familjen. Më kanë marrë pronën me forcë dhe e kanë tjetërsuar atë, më kanë prishur të gjitha bizneset, më kanë vëne gjoba, me kanë krijuar shumë incidente fizike, dhe kanë tentuar dhe të më eliminojnë. Më kanë arrestuar një javë para zgjedhjeve në shtëpi, në ora 12 të natës, kjo u bë nga Drejtoria e Policisë për arsye politike, pa asnjë mandat nga prokuroria. Policia e drejtuar nga ish-ministri i Rendit veproi si grup kriminal, pikërisht në këtë ditë unë kisha denoncuar emrat, nga të cilët kërcënohesha dhe po këta njerëz mbroheshin nga shteti. Për këto kam bërë denoncime në polici e prokurori, por çës-htjet janë mbyllur, pasi ato mbrohen nga persona me pushtet politik.