"Vanila Sky" marton vajzat e Shqipërisë me maqedonasit e Tetovës

Selia e agjencisë "Vanila Skaj" gjendet në qendrën tregtare mbi tregun e gjelbër të Tetovës, në një vend të fshehtë, i rrethuar me lokale afariste që kanë pronarë maqedonas. Ekipi i "Koha Ditore" arriti që të zbulojë zyrën e kësaj agjencie, por në derën hyrëse nuk shkruante emri i firmës "Vanila Skaj", ndërkaq e njëjta funksiononte vetëm si zyrë avokati. Boshko R. Rafajlovski mendohet të jetë shefi i kësaj agjencie, pasi që emri i tij gjendej në derën hyrëse të së njëjtës zyrë.

Agjencia që ndërmjetëson martesat mes maqedonasve nga Tetova dhe vajzave shqiptare nga Shqipëria Veriore pas disa viteve ilegalitet, ka vendosur të zyrtarizojë veprimtarinë, duke e hapur një zyrë në pjesën qendrore të qytetit.
"Vanila Skaj" është emri i kësaj agjencie për "zemrat e vetmuara", që tanimë ka bërë edhe shpalljen zyrtare në televizionin lokal maqedonas "Kiss", ku klientëve u ofrohet ndërmjetësim për martesat me vajzat nga Shqipëria.
Në këtë shpallje, që për disa ditë po emitohet në televizionin e sipërpërmendur, nuk precizohet shuma e parave që klientët duhet të paguajnë për t'u bërë dhëndër Shqipërie, por thuhet se çmimi është sipas marrëveshjes.

Avokati Boshko Rafajlovski pronar i agjencisë

Selia e kësaj agjencie gjendet në qendrën tregtare mbi tregun e gjelbër të Tetovës, në një vend të fshehtë i rrethuar me lokale afariste që kanë pronarë maqedonas.
Boshko R. Rafajlovski mendohet të jetë shefi i kësaj agjencie. Ai kishte vendosur në derë dy numra telefoni për të interesuarit edhe atë njëri fiks dhe njëri numër ishte i celularit të tij. Por, ai të hënën nuk ishte në vendin e tij të punës.
"Boshkoja nuk është në zyrë, ai punon vetëm me termine dhe nëse nuk caktoni ndonjë takim, nuk mund edhe të takoheni me Boshkon", tha një afarist maqedonas, i cili punonte si frizer afër agjencisë "Vanila Skaj". Gazeta tentoi që nëpërmjet telefonit të kontaktojë me Boshko Rafajlovskin, i cili nuk ishte i pakapshëm për deklaratë. Me vet faktin se Rafajlovski shpalljen për ndërmjetësim për martesa me vajza nga Shqipëria e ka dërguar vetëm në televizionin maqedonas "Kiss", ai ka bërë të ditur se kryen shërbime vetëm për qytetarë të etnitetit maqedonas. Shqiptarët janë të padëshirueshëm në zyrën e Rafajlobvskit, dhe kjo u vërtetua kur fqinjët e tij kuptuan se ekipi i gazetës "Koha Ditore" investigon punën e tij.

500 euro për një nuse nga Shqipëria

Sipas të dhënave të sigurta të gazetës, çmimi për shërbimin e kryer, "Vanila Skaj" kërkon 500 euro, të cilën në të shumtën e rasteve i paguan dhëndri.
Drejtuesit e kësaj agjencie sipas burimeve të gazetës kanë lidhje me agjenci të ngjashme në Shqipëri, kurse në zyrën e Tetovës punojnë edhe shqiptarë të cilët mbajnë kontakte të drejtpërdrejta me kolegët e tyre në Shqipëri.
"Koha Ditore" kohë më parë informoi se gjatë dhjetë viteve të fundit, mbi 300 vajza nga Shqipëria janë martuar me maqedonas nga Tetova. Sipas Qendrës për Punë Sociale në Tetovë, mësohet se kjo tendencë ka vazhduar edhe gjatë këtij viti, madje vihet re një shtim i numrit të maqedonasve që martohen me vajza shqiptare.

Martesa e parë shqiptaro-maqedonase, zyrtarisht është regjistruar në vitin 1995 kur një vajzë nga Shqipëria veriore ka hyrë në lidhje bashkëshortore me një maqedonas, që në atë kohë ka qenë një befasi e madhe duke pasur parasysh përkatësinë nacionale të këtij çifti. Numri i martesave të këtilla, deri në vitin 2000 ka qenë tepër simbolik, kurse numri i tyre është shtuar me shpejtësi pas vitit 2001, kohë kur është shënuar edhe numri më i madh i martesave të tilla. Nada Bllazhevska, sociologe në Qendrën për Punë Sociale në Tetovë, ka pohuar për një rritje të vazhdueshme të martesave të tilla.
"Ende nuk dihet se cilat janë shkaqet që lidhjet bashkëshortore mes shqiptareve dhe djemve maqedonas shënojnë rritje vazhdimisht, por sigurisht përkatësia katolike e të dyja palëve dhe karakteri shumë i urtë i vajzave nga Shqipëria bën që ato të jenë shumë të kërkuara në Tetovë", ka thënë Vllazhevska.

Nuset maqedonase kryesisht vijnë nga Shkodra

Vajzat që martohen me burra maqedonas vijnë nga Shqipëria e veriut, kryesisht nga fshatrat e Shkodrës, kurse mbi 90 për qind e tyre janë katolike. Ato janë martuar me banorë të fshatrave të Tetovës, që janë me shumicë maqedonase si Brevenicë, Dobrosht, Ratajë, Tearcë, Zhillcë, Vratnicë dhe Jegunovc. Mosha mesatare e këtyre vajzave është 24 - 35 vjeç. Për sociologët është interesant fakti se asnjëri prej këtyre çifteve të martuara me ndërmjetësinë e agjencive ilegale nuk ka parashtruar kërkesë për ndarje në institucionet përkatëse në Tetovë. Zyrtarët thonë se vajzat shqiptarë që janë martuar me djem maqedonas kanë pohuar se një hap të tillë e kanë marrë me dëshirën e tyre, ndërsa kanë shtuar se problemet në këto lidhje janë mosnjohja e gjuhës dhe e partnerit.

"Në bisedat që kemi zhvilluar me këto vajza, asnjëra prej tyre nuk ka deklaruar se ka hyrë në bashkëshortësi si pasojë e frikës apo presionit, por përkundrazi të gjitha na kanë deklaruar se me vetë dëshirë dhe me lejen e familjes së tyre kurorëzohen me qytetarë maqedonas", ka deklaruar sociologia Nada Vllazhevska.

Shënim i Shkoder.net...:
Disa zakone patrialkale në Shqipëri, dhe sidomos në veri të Shqipërisë, kanë bërë që me ndryshimet shoqërore të post-komunizmit, shoqëria shqiptare të përballohet me një turbulencë, e cila ka shkaktuar ikjen e meshkujve në emigracion dhe pamundësinë e vajzave shqiptare për t'u martuar në kohën e duhur, me njeriun e duhur. Për më tepër, zakonet shoqërore, i pengojnë vajzat shqiptare, sidomos në veri, që të zgjedhin vetë shokun e jetës, (edhe nëse dicka bëhet ilegalisht), kështu që kur ato mbesin pa u martuar, për të gjetur një burrë, e shesin veten 500 Euro... si në rastin për të cilin flet shkrimi i mësipërm.
Kjo është një fatkeqësi për ato vajza që detyrohen të ndjekin një rrugë të tillë. Të urojmë që të mos jenë shumë!