ALEANCA E RE LEVIZJA KONSERVATORE PER RIKTHIMIN E VLERAVE KOMBETARE

Të gjitha grave, vajzave, burrave dhe djemve shqiptarë të bashkohen me qëllimin e vetëm për të rikthyer vlerat në një shoqëri ku ka humbur sensi njerëzor i gjërave;

të bashkohen për të rikthyer vlerat e kombit që po kthehet në një kafshatë për t’u shqyer nga pushtetarë të korruptuar, nga politikanë të pashkolluar e të paemancipuar sidhe nga fqinjë dashakeqas;

të bashkohen në një lëvizje si kjo që ka një platformë me qëllim konservimin e vlerave, të traditave, të kulturës kombëtare dhe aspak promovimin e instikteve nacionaliste dhe shoviniste me fqinjët; që ka një platformë për pasurimin e vlerave të shoqërisë në mënyrë të pandalshme nga emigrantët: politikë, ekonomikë, kulturalë, të të gjitha shtresave. Po, sepse ka edhe emigrantë kulturalë Shqipëria dhe janë pikërisht ata që për të mos u pajtuar me mediokritetin e "intelektualëve" që mbajnë kolltuqet në Shqipëri, për të mos ndërprerë hovin e dëshirave të tyre për t’u thelluar mbi dijen e pafundme, kanë vendosur t’u largohen intrigave, antikulturës dhe presioneve partiake-klanore;

të bashkohen të gjithë ata që jetojnë prej vitesh emigracionin politik dhe ekonomik të detyruar nga politikat dashakeqase të individëve ose grupeve të papërgjegjshëm;

të bashkohen me këtë lëvizje kudo që ndodhen, në të gjitha skajet e botës, si shqiptarë, pa dallim bindjesh, opinionesh dhe shtrese shoqërore:

të vjetër, të rinj, intelektualë, artistë, profesionistë, punëtorë dhe të papunë,

të gjithë ata që me shpirt dhe me zemër shqiptari, të mërzitur dhe të revoltuar për emigracionin e gjatë dhe të padëshëruar në tokë të huaj, janë dhe ndjehen ndërkohë që në Shqipëri del dielli çdo ditë të vitit dhe Zoti iu fal shqiptarëve të gjitha të mirat e kësaj toke, të cilat vidhen, prishen, sabotohen, keqpërdoren;

të bashkohen të gjithë ata që duan të japin kontributin e tyre në zbatimin e një programi tashmë të hartuar: politik, kultural, ekonomik, për nxjerrjen e Shqipërisë nga humnera ku e kanë futur të paditurit e "oborrit të kuq".

Kjo lëvizje nuk ka lidhje me PS, PD, KOP etj… etj… etj, që rezultuan të ishin pjellë e njëra tjetrës… pula vezën apo veza pulën!

Kjo lëvizje është e pastër, e pakërcënueshme, e paprekshme, si çdo shqiptar që morri rrugën, u largua, mbajti hallet, përuljen dhe pozicionin e emigrantit që të bren përbrënda;

është e pastër sepse lind me emigrantin, duke filluar me paratë që i mungojnë, me dokumentat që s’i ka, me punësimin që s’është kollaj, me integrimin që është i vështirë, me mallin për familjen që të mbyt, me dinjitetin që të rri larg; më pas shoqëria, të afërmit, toka, prona dhe mbi të gjitha vendi yt. Atëherë përse të mos bashkohemi dhe t’i themi njëri tjetrit:

PERPARA!

Me ide, me marrje përgjegjësish, me energji dhe protagonizëm! Pa rënë në grackën e së keqes, siç do donin të na shihnin ata që na detyruan të hymë në këtë lojë!

PERPARA!

Në shtëpitë tona! Në vendin tonë! Në tokën tonë! Në pronën tonë!

DJATHTAS PER KOMBIN TONE!

Ne jemi si ju, emigrantë pa tituj, pa poste, pa lakmi, pa vese që na shtyjnë të ndyejmë duart me bukën e shqiptarëve të varfër. Por jemi të ditur, të mprehtë dhe të vendosur. Jemi emigrantë politikë, ekonomikë, kulturalë. Jemi njerëz që duam drejtësi, drejtësi dhe jetë të gjatë për kombin tonë, për gjuhën shqipe, për kulturën dhe identitetin tonë. Pa komb je edhe pa identitet, e ju e dini se çfarë do të thotë të jesh në vend të huaj pa identitet, me kokën ulur. E përse duhet të rrimë ne me kokën ulur? Përse ne duhet të gënjejmë shpesh herë kur na pyesin për identitetin tonë? Kush na e bëri këtë të keqe kaq të madhe?

Këto dhe pyetjeve të tjera si këto, të bashkohemi e t’u japim përgjigje të bashkuar. Ne, 1 milion e dyqindmijë emigrantët shqiptarë, pa llogaritur ata nga Kosova, Maqedonia dhe Mali i Zi, që nuk do prisnim një minutë për të dhënë kontributin tonë, mendimin tonë, nga më i vogli deri tek më plaku, për të rikthyer dinjitetin që duar të errëta na e morën ndër vite.

Aleanca e Re, do dhe duhet të jetë, me kontributin e të gjithëve pa përjashtim, aleanca e re e shqiptarëve me botën që e rrethon. Do të jetë aleanca e re e shqiptarëve me botën e emancipuar, duke parë se ato të vjetrat, pra aleancat me botën e kuqe nuk na sollën përveçse të këqija.

Aleanca e Re, me eksperiencën, dijen, kulturën dhe temperamentin e shqiptarëve që jetojnë prej vitesh në perëndim, dëshëron të ofrojë zgjidhje të reja dhe afatgjata për shqiptarët. Dhe zgjidhja duhet të fillojë nga Tirana dhe istitucionet e saj, ku është përqëndruar edhe goditja më e egër e dashakeqasve të Shqipërisë. Shqiptarët përpiqen në Kosovë, Maqedoni dhe Mal të Zi e të keqen e kanë mu në mes të sofrës, në zemër të vendit, në Tiranë.

Aleanca e Re u thotë shqiptarëve:

PERPARA!

Të gjithë përpara, të bashkuar, në ide, dashuri kombëtare, por edhe në buxhet, sado i vogël qoftë ai, sepse në këtë mënyrë do të ringremë një shoqëri moderne, ekzistuese (sepse modernizmi ekziston mes nesh), dhe të aftë që të përballojë ajo vetë sfidat e shekullit;

të bashkuar edhe pse të ndryshëm në opinione, tolerantë por konservatorë, të kujdesshëm por jo nacionalistë provincjalë. Ne kemi se ç’t’u tregojmë fqinjëve në kulturë, traditë dhe bashkëjetesë. T’i luftojmë me qytetërim ata që duan të na përshkruajnë si djaj të zinj që vijnë nga fundi i tokës;

të bashkohemi për t’u dhënë më tepër besim miqve dhe aleatëve tanë, për të mos bërë vetëm rrolin e lypsarëve që kanë luajtur deri më sot politikanët shqiptarë;

t’u japim një alternativë miqve të kombit tonë që janë lodhur dhe mërzitur tërë këto vite me personazhet që ju i njihni mirë (nuk meritojnë as t’u përmendet emri);

të bashkohemi që t’u tregojmë miqve që ne jemi një komb, një komb që ka rezurse, që ka traditë mikpritjen, që i respekton dhe iu qëndron besnik aleancave;

të bashkohemi që të tregojmë se jemi të aftë të administrojmë istitucionet me urtësi dhe dinjitet, me zgjuarsi dhe aftësi për t’u zhvilluar ekonomikisht, kulturalisht, politikisht;

Të nderuar shqiptarë, emigrantë, bashkombas!

Kjo iniciativë ka për qëllim të saj administrimin e burimeve më të vyera që ka një komb, pra burimin njerëzor. Çdo njeri është vullnet i Zotit, Atij të Madhit, të përbashkëtit për të gjithë, pra si i tillë çdo njeri ka një vlerë. Atëherë,

të bashkojmë këto vlera dhe të biem në Shqipëri ndryshimin, kultural, vizionar, politik, ekonomik.

Të gjithë bashkë do t’ja arrijmë. Ne jemi shumë dhe kemi mundësi të pashembullta organizimi. Gjërat kur janë të drejta, janë edhe të thjeshta. Kur janë fryt i një thirrjeje shpirtërore, kombëtare, kulturale, jetike, ato janë të pandalshme.

Një njeri krijon në vetvete një numër.Të gjithë numrat, pra njerëzit, krijojnë një forcë, një lëvizje e cila është e destinuar të triunfojë,

TE SJELLE NDRYSHIMIN

Ne do të bëhemi faktor. Faktor do të thotë që askush të mos na çensurojë më mendimin, por të kemi gazetën tonë, faqen tonë të internetit, fondin tonë të përbashkët në dispozicion të qëllimit tonë dhe jo të interesave personale. Faktor do të thotë se kur je i madh në numër dhe në ide, je i plotë, i denjë për t’u marrë në konsideratë. Askush nuk mund të tallet më me ty, me idetë e tua, me nevojat dhe dëshirat e tua.

Kështu të tjerët do të na respektojnë. Këto sinjale vijnë, të jeni të sigurtë për këtë, nga Amerika e madhe, nga Europa Nëna Jonë, nga forcat politike më të spikatura në arenën ndërkombëtare. Ata duan ndryshimin. Duhet besim tek vetja dhe tek kombi. Ky binom madhështor që ka triunfuar gjatë gjithë historisë së njerëzimit, duhet të na japë forcë dhe kurajo për t’u bashkuar. Ne individualisht nuk kemi të sharë, bashkarisht mund të jemi të mrekullueshëm.

Ideja e këtij dokumenti ka për qëllim të krijojë një listë të gjatë, aq të gjatë sa e gjithë historia e shqiptarëve. Krijimi i një liste me një numër të pafund personash do bëjë të mundur krijimin e një lëvizje politike apo partie që aktualisht duket term i dalë jashtë kohe, sepse kur je i fortë në numër nuk ke nevojë për copa letrash si i thonë. Kjo lëvizje do bëjë të mundur shqyrtimin e ideve të secilit prej firmëtarëve, ose anëtarëve, ide këto që do përcillen anembanë globit, prej nga do të rikthehen të formuluara drejt, saktë dhe pastër. Në mënyrë moderne dhe bashkëkohore, çdo anëtar do japë një mendim, një votë, nëpërmjet internetit ose telefonit.

Dhe në fund, pse jo, mund të firmosim një dokument të gjatë me 1 milion e 200 mijë firma. Ukrahinasit do të na kishin zili. Numrat janë fakte, jo llafe.

Propozimi bëhet nga një grup miqsh që jetojnë prej vitesh në perëndim dhe që përfaqësohen zyrtarisht nga Alban Guri.

Alban Guri, datëlindja 1970, në moshën 20 vjeç arratiset drejt Italisë.

Pasi merr pjesë në demostrat e dhjetorit 1990 dhe zhgënjehet nga performansa e të gjithë aktorëve të kohës, përfshi këtu edhe "të rinjtë" Blendi Gonxhe dhe Edi Rama. Kupton se duhet të largohet dhe të gjejë me kalimin e viteve çelsin e krijimit të një lëvizjeje të emancipuar politike, shoqërore, qytetare, kombëtare.

Azilant Politik që në momentin e parë të mbërritjes në Itali, në moshën 20 vjeçare. Merr njohuri të shumta në fushën e së drejtës, filozofisë, sociologjisë. Bashkëpunon me istitucione shtetërore në fushën e drejtësisë dhe merr eksperienca të vyera në fushën e organizimit të shtetit. Lëvron krijimtarinë letrare, gazetareske, opinioniste, publiçistikën në përgjithësi. Përkthen shkëlqyeshëm nga Italishtja dhe nuk rresht së pari dhe së jetuari çdo gjë politikisht, djathtas, në dobi të kombit.

Me rreziqe jo të vogla kërkon ose tenton të organizojë një lloj lëvizjeje të djathtë në Shqipëri, por pa sukses. Qarqet e vjetra: të kuqe, të zeza, jeshile etj, pa dashur t’u vemë emra, janë të konsoliduara tashmë dhe kontrollojnë me dhunë dhe mashtrime çdo segment të shoqërisë në Tiranë dhe në qytetet e mëdha. Veriu është i izoluar, i varfër dhe i gënjyer nga pseudo të djathtët, kështu efektet dhe pikënisja duhej kërkuar larg, në perëndim, andej nga vjen e mira. Pra, protagonistja mbetet diaspora (Ju kujton ndonjë analogji Ukrahina?). Në shtator 2005 rikthehet përsëri në Itali, duke i shpëtuar rreziqeve që mund të imagjinohen, të kurdisura nga të gjithë ata që mendojnë se Shqipëria është "bahçja e tyre" ose "kullota e tyre" dhe s’duhet të futet kush. Nuk po zgjatemi në origjinën e familjes së respektuar dhe të persekutuar, aqsa ka ndërruar dhe mbiemrin nga Drini në Guri.

Ky koment i fundit bëhet në respekt të të gjithë atyre që do donin të dinin të paktën se si quhen njerëzit që mendojnë të punojnë sëbashku. Pra një prezantim i shkurtër.