Vulaj: Ndjejmë frustrimin e popullatës në çdo vizitë

Deklaratat e fundit të qeverisë shqiptare dhe njëkohësisht të kreut të opozitës e kanë rreshtuar Këshillin Kombëtar Shqiptaro-Amerikan në anën e tyre. Por drejtuesi i këtij Këshilli, Martin Vulaj, që ndodhet në Shqipëri prej disa ditësh në vazhdën e takimeve që ka pasur edhe në vende të tjera të Ballkanit, në një intervistë për "Shekullin", deklaroi pardje, para nisjes së tij në Mal të Zi, se nuk bëhet fjalë për mbështetje ndaj ndonjërës prej forcave politike në vend. "Fatkeqësisht është e vërtetë se edhe pozita edhe opozita kanë bërë deklarata në të cilat shpallin një farë mbështetje prej nesh. Por, duke nxjerrë ca gjëra jashtë kontekstit, përpiqen ta përvetësojnë mundimin tonë për interesa të ngushta partiake", - thotë z.Vulaj.

Pas takimeve që keni bërë me përfaqësues të opozitës dhe me kreun e ekzekutivit shqiptar, kanë dalë deklarata të tyre në lidhje me mbështetjen tuaj për të dy palët. Në fakt, si është e vërteta, cilën prej tyre mbështet Këshilli Kombëtar Shqiptaro-Amerikan?
Fatkeqësisht është e vërtetë se edhe pozita edhe opozita kanë bërë deklarata në të cilat shpallin një farë mbështetje prej nesh. Them fatkeqësisht, sepse janë gjëra të tilla që shkaktojnë zhgënjim në njerëzit që interesat e tyre i kanë thjesht për të ndihmuar popullin shqiptar. Duke nxjerrë ca gjëra jashtë kontekstit, përpiqen ta përvetësojnë mundimin tonë për interesa të ngushta partiake.

E vërteta është që ne jemi organizatë jopartiake si në Amerikë, si në Shqipëri, si në çdo vend. Interesat tona janë më të gjera dhe kanë të bëjnë me avancimin e çështjes së kombit shqiptar dhe për forcimin e lidhjeve shqiptaro-amerikane. Çdo gjest lexohet në mënyra të ndryshme në Shqipëri dhe vizita jonë, ashtu siç del edhe nga këto deklarata, çdo lexim për mbështetjen e një ane apo të një tjetre është lexim i gabuar.

Si e shikoni Shqipërinë sot?
Unë mendoj se ajo që po ndodh në Shqipëri tani, është autentike. Në kuptimin që në çdo vizitë e ndiejmë në mënyrë më të theksuar shqetësimin e popullatës, frustrimin e saj. Neve na duhet të përqëndrohemi në realitet, sepse ekzistojnë shqetësime dhe frustrime reale në këtë vend të cilat, të gjithë pushtetarët kanë detyrë morale dhe ligjore, që t´i zgjidhin. Dhe këto shqetësime dhe probleme në shoqëri dhe sidomos në qeveri rrezikojnë progresin.

Mendoj që pengesa kryesore për integrimin është imazhi dhe realiteti i korrupsionit në shtetin shqiptar dhe ky është një rreth vicioz. Ekziston një realitet që pengon edhe zhvillimet në shoqërinë shqiptare, që pengon konsolidimin e institucioneve, që pengon krijimin e një sistemi juridik funksional. U jemi drejtuar disa herë përfaqësuesve qeveritarë, se pa marrë masa konkrete, të dukshme drejt korrigjimit të këtij fenomeni të errët, Shqipëria do të vazhdojë të ketë pengesa për të ecur përpara.

Kryetari i opozitës, Sali Berisha ka kërkuar mbështetjen nga ana juaj me ekspertë për çështjen e hetimit të Albtelekomit. Çfarë do të bëni ju?
Kur kemi kuptuar pak a shumë se ekziston së paku një dyshim rreth Albtelekomit, për ne e rëndësishme ka qenë që të krijohet një proces transparent. Rezultati duhet të jetë i qartë dhe i besueshëm, jo vetëm nga elementët në politikë, por ç´është më e rëndësishme, për popullin shqiptar. Kështu që ne kemi menduar se duhet një aspekt objektiv në komisionin hetimor rreth kësaj çështjeje. Në Shqipëri ka pasur komisione të ndryshme dhe ne mendojmë se jo të gjithë besojnë në komisione. Ka arsye që nuk besohet. Kështu që në qoftë se bashkangjitet një element jo me kapacitet vendimmarrës, por me cilësinë e vëzhguesve, që të mund t´i japë këtij komisioni ekspertizën dhe vendimi i tij të bazohet në këtë ekspertizë, ne besojmë se krijohet një proces transparent, në të cilin rezultatet e tyre do të besohen nga të gjithë.

Procesi në këtë rast është shumë i rëndësishëm, sepse duke krijuar një proces transparent përforcohen institucionet, afrohet populli me qeverinë sepse po krijohet një shkëputje, që është e rrezikshme për shtetin shqiptar. Natyrisht, edhe rezultatet janë të rëndësishme, sepse nëse ka abuzime në këto marrëveshje është normale që ato të korrigjohen dhe ajo që populli shqiptar ka humbur, nëse vërtet ka humbur, duhet t´i rikthehet. Ne kemi ofruar ndihmën tonë, sepse në diasporën shqiptaro-amerikane ka edhe ekspertë të telekomunikacionit dhe kemi akses te këta ekspertë amerikanë, të cilët e dimë që mund të angazhohen në këtë proces.

A është biseduar për një afat, në lidhje me pjesëmarrjen tuaj në këtë proces hetimi?
Ende po presim përgjigje nga qeveria, kurse opozita e ka përshëndetur dhe ka kërkuar ndihmën tonë, por ne nuk do të ofrojmë ndihmë në mënyrë partiake, por do t´ia ofrojmë ndihmën komisionit parlamentar. Sa për afat, do të shikojmë situatën pasi të kthehemi në Shtetet e Bashkuara dhe të diskutojmë me kryesinë tonë dhe do të shikojmë edhe reagimin zyrtar të qeverisë rreth kësaj çështjeje.

Cili do të ishte komenti juaj përsa i përket protestave kundër qeverisë në Tiranë?
I përgëzojmë të gjithë pjesëmarrësit, organizatorët dhe zyrtarët e rendit publik për sjelljet e tyre gjatë demonstratës së fundit, është një shembull që populli shqiptar ka kapacitet për të shprehur në mënyrë qytetare, që dëshmon se ky është një shtet evropian. Rëndësia e kësaj është se ky frustrim dhe kjo pakënaqësi që po shpreh ky popull po trajtohet në mënyrë shumë serioze dhe se procesi siguron që Shqipëria si shtet nuk do as humbje kohe, as hapa mbrapa në zhvillimin e saj, dhe çdo formë që merr ky proces duhet të sigurohet se ka për të mbetur brenda këtij konteksti. Por pa pasur ndryshime ose reforma të theksuara do të jetë shumë e vështirë që të adresohet frustrimi real i popullsisë. Natyrisht Shqipëria si një vend i varfër do të vazhdojë të ketë probleme dhe popullata është e vetëdijshme për këtë gjë. Por janë edhe disa gjëra që janë të papranueshme, si niveli i korrupsionit.

Varfëria që fatkeqësisht ekziston, po e vë një pjesë të popullatës në një pozitë që të zgjedhë mes pagesës së faturës elektrike dhe blerjes së qumështit të fëmijëve. Ky është një realitet, i cili nëse nuk do të adresohet, do të jetë potencial për destabilizimin e vendit. Po shohim edhe shembuj pozitivë, se si në një shtet dhe shoqëri në tranzicion, ky frustim jo vetëm po manifestohet, por edhe po kanalizohet në mënyrë konstruktive. Shembull për këtë është lëvizja "Mjaft" që ka pasur mundësi ta kanalizojë këtë energji në kërkesa për reforma konkrete që janë konstruktive dhe konsolidojnë shtetin, si dhe lëvizje të tjera si "Koalicioni kundër korrupsionit", që po punon për deklarimin e pasurisë së politikanëve, për infrastrukturën ligjore kundër konfliktit të interesit, gjëra që do t´i mundësojnë shtetit shqiptar të zgjerojë infrastrukturën e tij ligjore dhe të jetë një shtet më funksional, më i qëndrueshëm dhe janë dëshmi konkrete se shoqëria shqiptare është duke u zhvilluar drejt një shoqërie evropiane.